[A:766]
གཡམ་བཟང་པའི་སྐབས།
འགྲོ་མགོན་གྱི་བུ་ཆེན་ཟྭ་རའི་སྐལ་ལྡན་ཡེ་ཤེས་སེང་གེ་ནི། སྐྱེ་བ་སྔ་མ་ཁམས་སུ་ཙི་ཕུག་ཅེས་བྱ་བར་སྐྱེས་པའི་ཚེ་མིང་ཙོལ་བ། རུས་ཀླད་རུ་ཡིན། དེའི་ཚེ་ཡུམ་ནི་དམར་གཟའ་པདྨ་ཞེས་བྱ། དེའི་དུས་སུ་བལ་བོད་མཚམས་ནས་བྱོན་པའི་རྣལ་འབྱོར་པ་བདེ་མཆོག་མཁན་པོ་ཞིག་ཡོད་པ་དེས་དབང་བསྐུར། རྣལ་འབྱོར་པ་དེ་ལ་ཇོ་མོ་ཅིག་དང་གཡོག་པོ་ནག་པོ་ཅིག་ཡོད་པ་ཡང་ཁོང་ལ་གནང༌། ཡུལ་དེ་ན་མི་སྤུན་ལྔ་ཡོད་པའི་ལྔ་ཚིགས་ཀྱིས་ཁོང་གི་ཇོ་མོ་འཕྲོག ཁོང་རང་གསོད་དུ་བྱུང་བས་བྲེད་ནས་མཛོད་ཕུགས་སུ་ཉལ་བས། གཡོག་ནག་པོ་དེ་ན་རེ། བྲེད་མི་དགོས་ངས་རུག་གེ་བསད་པས་ཆོག་ཟེར། ཁོའི་ལག་པའི་མཐིལ་ན་རལ་གྲིའི་མཚན་མའང་ཡོད། དེ་ནས་རུག་གེ་བསད། ངེས་པར་དབང་བསྐུར་བའི་སློབ་དཔོན་དེ་བདེ་མཆོག་དང༌། ཇོ་མོ་དེ་ཌཱ་ཀི་མ་དང༌། གཡོག་པོ་ནག་པོ་དེ་དཔལ་མགོན་པོ་ཡིན་པར་གདའ། ཞེས་ཟྭ་ར་བ་ཉིད་ཀྱིས་གསུངས། ཟཱ་ར་བ་སྐུ་ཚེ་འདིར་མོན་འགར་དུ་འཁྲུངས། གཞོན་དུས་ར་འཚོ་བའི་ཚེ་རི་ཁ་ནས་ཕག་མོ་གྲུ་པའི་དགོན་པའི་རི་མཐོང་བ་ཙམ་གྱིས་སྒོམ་རང་བྱུང་དུ་ཤར། སྒོམ་ཆེན་གཉིས་ཀྱིས་སྒོམ་གྱི་གླེང་སློངས་བྱས་པས། དེ་སྒོམ་ཡིན་ན་ངས་ཀྱང་སྒོམ་ཤེས་པར་འདུག་སྙམ་ནས། དགོན་པར་བྱོན་ནས་འགྲོ་མགོན་