[A:771]རྩ་བདུན་བྱུང་ཞིང༌། དེ་རྣམས་མཆོད་རྟེན་རེ་བས་བྱིན་རླབས་ཆེ་གསུང༌། གནས་གཞན་དང་ཡར་ཀླུངས་ཤར་ནུབ་རྣམས་སུ་ཆོས་འཁོར་གྱི་གཙོ་བོ་མཛད་པ་དང༌། ཆོས་ཁྲི་བྱུང་བ་ལ་གྲངས་མ་བྱས་ལ། ཆོས་འཁོར་ལ་བྱུང་བའི་འབུལ་བ་རྣམས་ཀྱི་ཐོག་ནས་ཟྭ་རར་ཡང་སྔ་ཕྱི་མང་དུ་བསྐྱལ། ཟྭ་ར་བ་སྐུ་གཟི་བརྗིད་དང་ལྡན་པ་ཞལ་འཛུམ་པ་ཅན་གཟིགས་པའི་སྣང་བ་ཡང་མང་དུ་བྱུང་ངོ༌། །དུས་ཞིག་གི་ཚེ་ཤམྦུ་ལྕལ་དུ་སེར་མདུན་ལ་ཚོགས་པའི་ཞལ་བརྡའ་མཛད་པས། སྦྲ་དཀར་ནག་ཕྱེད་དང་བཞི་བརྒྱ། རབ་ཏུ་བྱུང་བ་ཁྲི་ཚོ་ཕྱེད་དང་གཉིས། མཁན་པོ་ཁུ་པས་དབུ་མཛད་སྐོས་གཏོང་བ་སུམ་བརྒྱ། གཡམ་བཟངས་པའི་རི་པ་བརྒྱ་ཚོ་ཉི་ཤུ་རྩ་གཅིག་འཚོགས། བྱར་ཨོག་ཨོག་ཡན། སྒ་འདྲ་མན། དྭགས་པོ་ཀྲོངས་ཁ་ཡན། མོན་འགར་མགོན་པོ་གདོང་མན། གྲོ་ཤུལ་ཆ་ཁྲོད་ཚུན། གངས་པར་གསེར་ཆུ་ཁ་ཡན། ལྷོ་བྲག་གཏམ་ཤུལ་ཚུན། ཡར་ཀླུངས་བྱ་སའི་བར་ལ་ལམ་རྒྱ་མཛད། གཞན་དོན་ཡུན་རིང་དུ་མཛད་ནས་དགུང་ལོ་དྲུག་ཅུ་རྩ་ལྔ་པ་ལྕགས་མོ་སྦྲུལ་གྱི་ལོར་གཤེགས། འདིས་གདུལ་བྱ་དཔག་ཏུ་མེད་པ་བསྐྱངས་པའི་ནང་ནས། སློབ་མ་སྒོམ་བཞིར་གྲགས་པ་ནི། གཉལ་སྨད་དཔལ་རི་བ་སངས་རྒྱས་བྱ་སྒོམ། གོར་གདོང་པ་སངས་རྒྱས་ལྷ་སྒོམ། གསེར་ལྟེ་བ་སངས་རྒྱས་ལེ་སྒོམ། དགོན་གསར་པ་སངས་རྒྱས་རྒྱ་སྒོམ་རྣམས་སོ། །ཆོས་རྗེ་གཤེགས་རྗེས་ཤིང་ཕོ་རྟ་ནས་ཉེ་གནས་རིན་ཆེན་ཇོ་སྲས་ཀྱིས་ཆུ་ཕོ་སྟག་གི་བར་གདན་ས་ལོ་དགུ་མཛད་ནས་གཤེགས། དེའི་རྗེས་སུ་རྟོགས་