[A:839]གཤེགས། དེ་ལོ་རང་རིན་པོ་ཆེ་ཤཱཀྱ་འབུམ་པ་ཤིང་མོ་གླང་ལོ་པས་སུམ་ཅུ་རྩ་བདུན་བཞེས་པ་ཞིག་གདན་སར་བསྐོས། དེ་རྟིང་ཆུ་ཕོ་སྟག་ཟླ་བ་བཅུ་གཉིས་པ་ལ་ཏི་ཤྲཱི་གྲགས་པ་འོད་ཟེར་སྐུ་གཤེགས། ཆུ་ཕོ་སྟག་འདི་སློབ་དཔོན་བྱང་རྒྱལ་གྱི་ལོ་ཡིན། ཆུ་མོ་ཡོས་ལ་འཇམ་དབྱངས་རིན་རྒྱལ་གོང་དུ་ཐེགས། རིན་པོ་ཆེ་ཤཱཀྱ་འབུམ་པ་གདན་སར་ལོ་བཅུ་བཞུགས་ཏེ་ལྕགས་ཕོ་ཁྱི་ལ་གཤེགས། རིན་པོ་ཆེ་བྱང་ཆུབ་དཔལ་བཟང་པོ་དགུང་ལོ་སུམ་ཅུ་པ་ཞིག་ལོ་དེ་ལ་གདན་སར་བསྐོས་ཏེ། ལྕགས་སྦྲུལ་ལ་འཁྲུངས། ལོ་ཞེ་བདུན་གདན་ས་མཛད་དེ་མེ་ཕོ་སྤྲེའུ་ལ་གཤེགས། དེ་རྗེས་སྤྱན་སྔ་གྲགས་པ་བཤེས་གཉེན་པ་ཆུ་ཕོ་ཁྱི་ལ་འཁྲུངས། སོ་དྲུག་པ་མེ་མོ་བྱ་ལ་གདན་སར་བསྐོས། གདན་ས་ལོ་ཉི་ཤུ་རྩ་བཞི་མཛད། དྲུག་ཅུ་བཞེས་པ་ལྕགས་བྱ་ལ་གཤེགས། དེ་རྗེས་ཆུ་ཁྱི་ནས་མེ་སྤྲེ་ཡན་ལ་ལོ་དགུ་བཅུ་གོ་ལྔ་སོང་སྟེ། སྤྱིར་ན་ཞང་རིན་པོ་ཆེ་འཁྲུངས་ནས་མེ་སྤྲེ་ཡན་ལ་ལོ་སུམ་བརྒྱ་དང་ལྔ་བཅུ་ང་བཞི་སོང་ངོ༌། མཚལ་གུང་ཐང་བའི་བླ་རབས་ཀྱི་སྐབས་སོ། །
སེམས་ཁྲིད་ཀྱི་བརྒྱུད་པའི་སྐབས།
ཆོས་རྗེ་སྒམ་པོ་བའི་སློབ་མ་སྐྱེ་བོ་ཡེ་རྡོར་གྱི་སྐྱེ་བ་དུང་ཚོ་རས་པ་ནི། ཡར་ཀླུངས་གཅེན་པ་སའི་གཡག་མཁར་སྔོན་པོར། ཡབ་ཞང་སྒོམ་འབྱུང་གནས་འོད། ཡུམ་ཁུ་མོ་ཁྱེ་འདྲེན་འབུམ་གཉིས་ལ་སྲས་གསུམ་ཡོད་པའི་