[A:72]bzhugs shing / bar du gung srong gung btsan gyis kyang rgyal srid cung zad mdzad pa'o/ /sgrol ma dang gos dkar mo dang dkar mo chen mo ni btsun mo'i mchog gsum ste/ kong jo dang / bal mo bza' dang / 'bring bza' ma thod dkar ro/ /li tsa byi'i rigs su byung ba ni yangs pa can pa'i brgyud yin pa'o/ /kla klo'i rgyal ni nub phyogs tA zhig gi yul la'ang dbang byed pa'o/ /de bzhin du rgyal po mang po ni 'og nas 'byung ba rnams te/ khyu mchog ni mang srong ngo / /khyu mchog bzang ni klung nam mo/ /sa 'od ni mes ag tshoms so/ /sa 'od bzang ni khri srong lde btsan no/ /pha rol gnon ni mu ne btsan po'o/ /rkang pa'i 'gros ni khri lde srong btsan no/ /sa srungs ni ral pa can no/ /be'u ni glang dar ma'o/ /'od ldan ni 'od srungs te/ /ldan pa dang bsrung ba la a ba ti zer ba'i phyir ro/ /tha mar 'char rgyal ngang tshul ni/ nyi ma 'char ba'i phyogs nas bod la dbang byed pa'i hor rgyal po yin zhes 'ga' zhig 'dod la/ shar kha zhes grags pa'i lung pa 'dir/ snyags kyis bkrongs pa'i dpal 'khor btsan yin yang rung ngo / /de nas bod spyi la dbang byed pa'i rgyal po med pas lugs rnam par zhig go /bod kyi rgyal po rnams rtsa rgyud nas lung bstan pa'i skabs so/ /