[A:༡༡༡]འབྲུམ་ནད་ཀྱིས་སྐྱོན་མི་ཡོང་སེམས་ལས་མི་དགོས་ཕེབས་པ་བཞིན་ཡབ་མེས་གོང་མའི་རྣམ་ཐར་ལྟར་གྱི་ལྷ་འབྲུམ་དཀར་པོ་བཞེས་ཏེ། ཞག་བཅུ་སྐོར་སངས་དེངས་ཀྱི་བཞི་ཐོག་དབང་ཁང་ཐེག་ཆེན་རིན་པོ་ཆེའི་བཞུགས་ཁྲིའི་སྟེང་ནས་རྗེ་རྡོ་རྗེ་འཆང་ཆེན་པོ་སྐུ་མཆེད་ལྔ་སོགས། སྐལ་ལྡན་གྱི་སློབ་བུ་བཅོ་ལྔ་ཙམ་ལ། རྣལ་འབྱོར་དབང་ཕྱུག་བིརྺ་པའི་བཞེད་གཞུང་ཡོངས་རྫོགས་བསྟན་པ་རིན་པོ་ཆེའི་ཉམས་ལེན། གསུང་ངག་རིན་པོ་ཆེ་ལམ་འབྲས་བུ་དང་བཅས་པ་ཚོགས་བཤད་སྨིན་གྲོལ་ཆ་ལག་དང་བཅས་པ། གོང་དུ་བསྟན་པ་བཞིན། ཆོས་ཀྱི་རྣམ་གྲངས་རྣམས་གདུང་རབས་རྣམ་ཐར་ཞལ་སྐོང་དུ་གསུངས་པ་བཞིན་གསན་སྐབས་ཡབ་རྗེ་རྩ་བའི་བླ་མ་ལ། སྔར་དང་མི་འདྲ་བའི་ཐུགས་དད་བཅོས་མིན་འཁྲུངས་པ་སོགས་གཞུང་ནས་གསུངས་པ་བཞིན་བླ་མའི་བྱིན་རླབས་ཐུགས་རྒྱུད་ལ་ཞུགས་པ་ནི་དམ་པའི་རྣམ་ཐར་ཁོ་ནར་ངེས། འདི་ལོ་བསམ་བརླིང་ལྷ་མཆོད་ལ་ཕེབས་པ་ནས་བཟུང་སྐབས་འགའ་མ་གཏོགས་རྣམ་ཀུན་ཕེབས། དེ་མཚམས་ནས་འདི་ཁུལ་ལ་ནད་དེ་ཇེ་ཆེར་མཆེད་པས་ཡབ་རྗེ་མཆོག་ནས་གསུང་ཆོས་འཕྲོ་བཤོལ་མཛད་དེ། ཐུབ་བསྟན་སྐྱོང་བའི་མེལ་ཚེ་ཆེན་པོ་རྣམས་ལ་འཕྲིན་འཆོལ་དང༌། ཞལ་ངོ་རྣམས་ལ་འཇམ་ནག ཁྱུང་ཁྲ་ནག རྟ་མགྲིན་སྐྱེར་སྒང༌། རྣམ་འཇོམས། སྨེ་དུད་སོགས་ཀྱི་རྗེས་གནང་དང༌། བརྒྱ་བཞི། མ་མདོས། གླུད་རྫོང་རིགས་ལ་ཐུགས་འགྲུས་དང༌། ལྗགས་ཆུ་སྲུང་བ་རིམ་གྲོའི་ཞལ་བཀོད་རྣམས་བཀའ་དྲིན་ཆེ་སྐབས། གཞུང་ཞབས་