[A:༡༡༢]རིན་པོ་ཆེ་ནས་མདའ་དཔོན་པད་ལྕང་ལྷ་རྫོང་སྐུ་ཚབ་སོགས་མངགས་པས་འོ་བརྒྱལ་རྨ་ཐོག་ཤུ་བརྩེགས་ཀྱི་རྗེས་སུ་སྙེགས་པ་ལྟ་བུ་དང༌། རིམ་གྱིས་དོན་དམ་རྡོ་རྗེ་ལྟ་བུའི་སྐུ་མཆོག་བརྙེས་སུ་ཟིན་པའི་རྗེ་རྡོ་རྗེ་འཛིན་པ་ཆེན་པོས་ཀྱང་ཀུན་རྫོབ་ལྟར་སྣང་དང་བསྟུན་པར་མཛད་དེ། སྙུན་བབས་ལྕི་བར་བཞེས་རུང༌། སྤྱི་བྱེ་བྲག་གི་བསོད་ནམས་ཀྱི་མཆོད་སྡོང་ཆེན་པོར་འགྱུར་མེད་རྡོ་རྗེ་གསུམ་གྱི་རང་བཞིན་དུ་མཛད་པའི་སྐུ་དྲིན་ཡང་བསྐལ་པར་གཞལ་བའི་གོ་སྐབས་དང་བྲལ། དེ་ལོའི་གྲོ་བཞིན་བཛྲ་ཀཱི་ལ་པའི་སྒྲུབ་མཆེད་དབུ་རྩེ་རྙིང་མར་ཚུལ་ཤིང་རྩ་འཆམས་ནང་དུ་མཛད་ནས་གྲུབ་མཚམས་ས་ཚོགས་སུ་མཛད་ཆོག་དང་ནད་ཐག་ཕལ་ཆེར་ཁྲུམས་ཟླའི་ནང་ཆོད་ནས་སྒོ་རུམ་སྟེང་འོག་སོགས་སུ་གཏང་རག་མཛད་དེ། ཟླ་སྐེད་ཙམ་ལ་ཞལ་ངོ་ཞབས་ཕྱི་རགས་བསྡུས་བཅས་ཁའུ་ཞེས་པ་པི་ཅིང་གི་སྐད་དུ་བཟང་པོ་ཞེས་པ་དང༌། སྤོ་ཁུའུ་ཞེས་པ་ངན་པ་ཟེར་བའི་བརྡ་སྟེ་གོང་བཟང་པོའི་ཡུལ་གྲུར་བདུད་རྩི་སྨན་ཆབ་ལ་ཕེབས་ཏེ། དབྱུག་ཟླ་ནས་ལམ་འབྲས་ཀྱི་འགྲོ་རྒྱུ་དབང་ནས་བཟུང་བསྩལ་བ་དང༌། རྗེས་འབྲེལ་རྩ་རྒྱུད་བརྟག་གཉིས་སོགས་གདན་ས་ཆེན་པོ་འདི་ཉིད་ན་ཆོས་སྤྱོད་བསྐང་སྐོར་བཅས་མང་དུ་གསན་པ་སོགས། ཟླ་གསུམ་ཙམ་གྱི་རིང་ཆོས་ཆར་བདུད་རྩིའི་ཟིལ་དངར་འབེབས་པར་མཛད་པའི་རྒྱུ་ལམ་དབང་གི་བཀའ་སྒྲུབ་སོགས་ཀྱི་སྐབས་རྗེ་རྡོ་རྗེ་འཆང་ཉིད་ཀྱིས་ཀྱང་ཞལ་རྒྱས་མཛད་པ་ལགས། དེ་སྐབས་ཀྱི་བར་སེང་རྣམས་ལ་ཡབ་རྗེ་མཆོག་དང། དབུ་བྱེད་ཡེ་ཤེས་རྒྱལ་མཚན།