[A:༡༤༠]ས་བསྟན་ནོར་འཛིན་དཔལ་མོའི་ལྗོངས་འདིར་དར་ཞིང་རྒྱས་ལ་ཡུན་རིང་གནས་པའི་ཐུགས་སྨོན་རྒྱལ་སྲས་མཆོག་སྤྱོད་པས་དུས་འདའ་བར་མཛད་པ་ས་ཟླའི་ནང་རགས་རྫོང་དགོན་ལག་བཅས་པར་ཀྱཻ་རྡོ་རྗེའི་རྒྱུད་དབང་དང་མཁའ་སྤྱོད་རྡོ་རྗེ་བཙུན་མོའི་བྱིན་རླབས་ཀྱང་སྩོལ་བར་མཛད། སྣྲོན་ཟླ་ནས་འཇམ་མགོན་མཐུ་སྟོབས་དབང་ཕྱུག་ཉིད་བསྟན་སྲུང་རྒྱ་མཚོའི་བསྟི་གནས་བདུད་ལས་རྣམ་རྒྱལ་དཔལ་མགོན་དགའ་བའི་ཚལ་དུ་བྲག་རྫོང་མའི་ལྗགས་བསྙེན་སྦྱིན་སྲེག་བཅས་མཛད་སྐབས་ནས་བཟུང༌། རྗེ་ཉིད་ཀྱིས་ཕུར་སྒྲུབ་ཆེན་མོར་གསུང་བཤད་ཀྱི་དགའ་སྟོན་སྩོལ་གནང་གི་སྔོན་འགྲོ་ཕྱག་དཔེ་འཛིན་སྦྱོང་ཕྲིན་བཅོལ་སོགས་མཛད་རྗེས། གྲོ་བཞིན་བཛྲ་ཀཱི་ལ་ཡ་སྒྲུབ་མཆོད་དུས་འདུས་པ་རྒྱ་མཚོའི་དབུས་སུ་ལེགས་བཤད་ཀྱི་དགའ་སྟོན་ལྷུག་པར་གྲོལ་བ་དང༌། མདོས་ཆུང་དང་སྐུ་རིམ་ཆེན་མོའི་ཟོར་འཛིན་གྱི་རྡོ་རྗེ་སློབ་དཔོན་བཀའ་དྲིན་ཆེ་རྒྱུའི་ལྗགས་བསྙེན་རྣམས་མུ་སྦྲེལ་གྱི་ཐུགས་བྲེལ་རྣམས་འབྱུང་འགྱུར་དང༌། དབྱུག་ཟླའི་ནང་སྤྱི་སྒེར་བསྟན་འགྲོའི་ཉེར་འཚེ་ཞི་ཕྱིར་རྗེ་ཉིད་ཀྱི་བཀའ་གསང་རྨད་དུ་བྱུང་བས་འདོམས་ཏེ། གང་གི་གཅུང་འཇམ་མགོན་མཆོག་ནས་སྒོ་རུམ་བླ་མ་ལྷ་ཁང་དུ་བཞུགས་ཡུལ་གྱི་བསེ་འབག་ནག་པོ་འཕུར་ཤེས་ཀྱི་སྐུ་དྲུང་དུ། ཞག་འགའ་བསྐང་ཕྲིན་ལ་ཐུགས་བརྩོན། དེང་སྐབས་མཁའ་འགྲོ་འདུ་བའི་དུས་ཀྱི་ཚེ། རྗེ་རྡོ་རྗེ་འཆང་ཉིད་ནས་དམ་ཅན་མོན་བུ་པུ་ཏྲའི་ཐུན་མོང་མ་ཡིན་པའི་གསང་རྟེན་གཉིས་གསར་བསྐྲུན་གྱིས། ཆོས་ཀྱི་རྒྱལ་པོ་འཕགས་པ་རིན་པོ་ཆེའི་