[A:༡༤༦]ཉེར་དྲུག་ནས་བཅོམ་ལྡན་འདས་སྙིང་པོ་ཀྱཻ་རྡོ་རྗེའི་གཞི་བསྙེན་ཟླ་དྲུག་གི་བར་དུ་བཀའ་དྲིན་ཆེ་སྐབས་ལྷག་པའི་ལྷའི་ཞལ་གཟིགས་པའི་རྟགས་འཁྲུངས་ཚུལ་གྱི་གསུང་ཡང་སྣང་བ་བཅས་འདི་ནི། རྗེ་རྡོ་རྗེ་འཆང་ནས་ཀྱཻ་རྡོར་གཞི་བསྙེན་གཉིས་པའི་སྐབས་དང༌། དེའི་ཚེ་དེའི་དུས་སུ་གདན་སའི་ལུགས་ཟུང་གི་མཛད་སྒོ་རྣམས་འཇམ་མགོན་མཐུ་སྟོབས་ཀྱི་མཚན་མཆོག་ཅན་ནས་གང་གིས་ཁུར་བཟོད་པར་མཛད་ཅིང༌། དེ་ལོ་མེས་སྲོང་སྡེ་པ་ཀུན་ཕན་དམ་ཆོས་རྒྱལ་མཚན་ལ་གནང་རྒྱུའི་གུར་གྱི་བྲིས་ཐང་ཐུན་མོང་མ་ཡིན་པ་ཞལ་བཀོད་གནང་སྐབས་སྔར་གྱི་གུར་ལྷ་བརྒྱད་སྟེང༌། དམག་ཟོར་རྒྱལ་མོ་བེ་ཅོན་ཐོད་ཁྲག་ལྟེ་བའི་ཐད་ཀར་མགོ་སྤྲོད་དུ་བཟུང་བ་ཞིག་འཁྲུངས་པའི་ཁྲོད་ནས་དབུ་མཛད་དབང་ཕྱུག་ཆོས་འབྱོར་ཡིན་སྙམ་པ་ཞིག་གིས་བྱང་སེམས་དཀར་པོ་ཀ་པཱ་ལ་གང་རྗེ་ཉིད་ལ་ཕུལ་བ་དང༌། གཞན་ཡང་གཉན་མགོན་ཞལ་བཞི་པའི་སྐོར་ལ་གཟིགས་སྣང་ངོ་མཚར་ཅན་མང་དག་ཡོད་གསུངས་པ་ལས། ཆོས་སྐྱོང་བཀའ་གཉན་པས་རེ་ཞིག་གསུང་མགུར་ལས་ཀྱང་མ་གྲོལ། འཆི་བདག་ལས་ཀྱི་གཤིན་རྗེ་ཕུར་ཁང་གི་སྒོ་ཚད་དང་མཉམ་པ་ཞིག་ཀྱང་བཀའ་གཉན་པའི་ཚུལ་གྱི་གཟིགས་སོ།།
དགུང་གྲངས་ཉེར་གསུམ་པ་ལྕགས་ལུག་སྣྲོན་ཟླའི་ནང་ཀྱཻ་རྡོ་རྗེའི་ལྗགས་བསྙེན་གྲོལ་ལ་ཁད་རིགས་བདག་ཐར་རྩེ་བ་ཉིད་ཕེབས་པས། རྗེ་རྡོ་རྗེ་འཆང་ཐུགས་དགེས་པའི་གསུང་ལས། བླ་མ་དང་ཡི་དམ་དབྱེར་མེད་དུ་འགྲུབ་པ་འདི་རྟེན་འབྲེལ་ཤིན་ཏུ་ལེགས་གསུངས་ཤིང་ལས་བཞིའི་སྦྱིན་