[A:༡༥༥]ཡང་མི་མཛད་པ་བཅས་རྗེ་རྡོ་རྗེ་འཆང་ཉིད་ནས་བཅར་བཞུགས་ཀྱིས་ཉིན་གང་འཁྱོལ། མཚནམོ་ཞབས་འབྲིང་པ་རྣམས་སྐུ་དྲུང་དུ་བཀས་མངགས་ཏེ་རྗེ་ཉིད་གཟིམ་ཕུག་གི་མདར་བཞུགས་པས། ནམ་ཕྱེད་ཙམ་ནས་མནལ་བདེ་མོར་ཁུགས་པའི་གནས་ཚུལ་སྙན་དུ་གསོན། སང་ཉིན་ནམ་ལངས་འཕྲལ་སྐུ་འཁྲིས་སུ་ཕེབས་པས་ཞལ་འདོན་གནང་ཐུབ་ཙམ་འདུག་པས་ཐུགས་བདེ། དེ་ཉིན་འཇམ་མགོན་གནས་གསར་བ་ནས་ཚེ་དབང་སོགས་བསྩལ་བ་ནས་རིམ་དྭངས་ཀྱིས་ཕུར་སྒྲུབ་སོགས་ལ་ཕེབས། དེའི་ཚེ་ཐར་རྩེ་དང་གནས་གསར་རྗེ་གཉིས་ཆར་ནས་བདག་མོར་རྟེན་འབྱུང་དངོས་པོའི་གནང་ཆ་དང་ལེགས་སློབ་ཞལ་ཏ་སྩོལ་བར་བཙུན་མོར་སྐུ་དངོས་ཕེབས། སྟོན་མགོར་ཐར་རྩེ་རྡོ་རྗེ་འཆང་ངོར་ཕེབས་གོང་གསུང་ལས། རྗེ་རྡོ་རྗེ་འཆང་དེ་ཉིད་མཁྱེན་རབ་ལ་ས་སྐྱ་པཎ་ཆེན་དང༌། མངའ་ཐང་ཕྲིན་ལས་ལ་འཕགས་ཆེན་བློ་གྲོས་རྒྱལ་མཚན་དང་མཐུ་སྟོབས་ནུས་རྩལ་སྔགས་འཆང་ཆོས་ཀྱི་རྒྱལ་པོ་དང་མཚུངས་པ་ཡོང་ངེས་རང་ལགས། ཞེས་ལྐོག་གྱུར་རྗེན་གསལ་གྱི་ལུང་བསྟན་ཐོག་ཏུ་འཁེལ་བ་སྩོལ་རྗེས་རིག་འཛིན་ཕོ་བྲང་གི་སྒོ་སྒྲིགས་སོགས་ཤིན་ཏུ་འགྲིག་པར་མཛད་དེ། ཕེབས་སྐྱེལ་ཞུ་མི་རྣམས་ལ་ད་ནི་གཟིམ་ཆུང་ཡ་གིར་ཡང་དེ་ཙམ་མོ། །ཞེས་འགྱངས་མིན་ནས་ཞིང་བརྗེ་བའི་གསུང་དང༌། སྟོན་ནས་དགུན་འགོའི་བར་གནས་གསར་རྡོ་རྗེ་འཆང་ནས་གསར་རྙིང་དུ་མའི་ཆོས་བཀའ་དང་ལྷག་པར་མགོན་པོ་ཞལ་བཞི་པའི་ཆོས་སྐོར་རྗེས་གནང་ཉམས་ཁྲིད་ལུང་སོགས་ཡོངས་རྗོགས་བསྩལ་ཞིང་ཕར་ཡང༌། འཇམ་མགོན་