[A:༡༦༡]བསྟོད་ཤེས་བྱ་ཐམས་ཅད་མ་སོགས་ཤླཽ་ཀ་གཅིག་ཕྲེང་འཁོར་རེ་ཆག་མེད་དུ་མཛད། གཞན་ཡང་འགྲོ་མགོན་འཕགས་པ་རིན་པོ་ཆེ་ཐེངས་གསུམ་ཙམ་གཟིགས་པའི་གཅིག་འབུམ་ཐང་ལྡེབ་བྲིས་ལ་ཡོད་པ་འདི་བཞིན་དང༌། རྒྱ་གར་ཤར་ཕྱོགས་ཟ་ཧོར་གྱི་རྒྱལ་ཁམས་དེ་དཔལ་ས་སྐྱ་ནས་བརྩམས་པའི་ལྷོ་ནུབ་ན་ཡོད་པར་ནམ་མཁའ་འཇའ་ཚོན་གྱིས་གང་བ་དང༌། སྐབས་ཤིག་མུས་ཀྱི་སྤང་སྟེང་ཞིག་ན་བླ་མ་རབ་བྱུང་བགྲེས་པོ་སྐུ་བེམ་དྲག་ཆེམ་མེ་བ་ཞིག་གསོལ་ནས་ཆོས་འཆད་མཛད་རྒྱུ་ཡིན་དགོངས་པ་དང༌། ཡང་མུས་ཀྱི་འདུ་ཁང་ཀ་བཞི་མ་ཁ་ལྷོར་བསྟན་ཞིག་ན། བླ་མ་བགྲེས་པོ་དེ་ག་བཞུགས་ནས་རྡོ་རྗེ་སྙིང་འགྲེལ་གྱི་བཤད་པ་མཛད་པ་དང༌། ཡང་དཔལ་ཆེན་ཕོ་བྲང་རྙིང་དུས་ཡོངས་རྫོགས་འཁྲུངས་པའི་གཡབ་ཁ་ནུབ་བསྟན་ཞིག་ཏུ་གུང་ཚིགས་མཛད་ཀྱིན་བཞུགས་པ་དང༌། ཞྭ་ལུའི་ལྡེབ་བྲིས་ལ་མཛད་པ་བཅུ་གཉིས་ཀྱི་བཤད་པ་གནང་མུ་ནས་བདེན་བཞིའི་ཆོས་འཁོར་བསྐོར་བ་བཤད་པའི་ཚེ་གོས་སེར་གྱི་སྣམ་སྦྱར་བཞེས་ནས་གནང་བ་སོགས་སྔོན་གནས་རྗེས་དྲན་ལྟ་བུ་ཡ་མཚན་མཚར་དུ་ཆེ་བ་དེ་རྣམས་ཀྱང་འཁྲུངས་ཤིང༌། ནག་ཟླའི་ནང་ནས་ཆུ་སྟོད་ཟླ་སྐེད་བར་ཀུན་རྫོབ་ལྟར་སྣང་དུ་རྡོ་རྗེའི་སྐུ་བརྙེས། རྗེ་རྡོ་རྗེ་འཛིན་ཆེན་པོ་ཉིད་ལ་སྐུ་ཁྲག་བརྟས་པའི་སྙུན་གཞི་བསྟུད་མར་བཞེས་ཚུལ་གྱི་སྐབས་འཇམ་མགོན་དཔལ་ལྡན་ཆོས་སྐྱོང་ནས་སྐུ་རིམ་གྱི་ཞལ་བཀོད་དང་ཉིད་ནས་ཀྱང་སྐུ་གེགས་སེལ་ཐབས་སྒོ་གང་ཟབ་མཛད་ཅིང༌། ལྷག་དོན་རྗེ་ཉིད་ཀྱི་ཐུགས་དམ་ཚེ་སྒྲུབ་རྣམས་ལ་བརྩོན་པར་མཛད་པས་རིམ་གྱིས་སྙུན་