[A:༡༨༣]བཟླས་སུ་བསྟར་ཞིང༌། རྟ་ཟླ་སྔོན་མའི་བཅུ་བདུན་ལ་སྡེ་དགེར་དཔལ་ལྡན་ཆོས་སྐྱོང་དང༌། ཕྱི་མའི་བཅོ་བརྒྱད་ལ་ཚེ་འཛིན་དཔལ་སྐྱེད་བུ་ཁྲིད་དམ་ཚུལ་ཁྲིམས་དཔལ་རྒྱས་དབང་མོའི་ཡུམ་ཕུན་ཚོགས་ཚེ་རིང་མ་གཤེགས་པས། སྔ་མའི་ཉི་དྲོས་ཙམ་ལ་ས་སྐྱའི་ནམ་མཁའི་དབྱིངས་ཐམས་ཅད་སྤྲིན་ཁ་དོག་ལྔ་ལྡན་སྔར་མཐོང་མ་མྱོང་བས་གང་བ་ཞིག་བྱུང་དུས། འཇམ་མགོན་དེ་ཞིང་བརྗེས་པ་ཉིད་ཀྱིས་མཁྱེན་པ་དང་བཅས་རྗེ་དེའི་དགོངས་རྫོགས་སུ་ལོ་ལྟར་དུས་དྲན་གྱི་ཐོག་བྱམས་ཆོས་སྡེ་ལྔ་ཀློག་འདོན་ཡང་མཛད། དབོ་ཟླའི་ནང་ཕུན་ཚོགས་ཚེ་རིང་མའི་དགོངས་རྫོགས་སུ་འཇམ་དབྱངས་ཀྱི་སྨན་སྐུ་ངོ་མཚར་ཅན་འདིའི་སྐུ་རྒྱུ་རྟེན་འདམ་དཔེ་བྲལ་མར་གྲགས་པ་སོགས་བྱིན་རླབས་ཕན་ཆེ་བ་དང༌། རིན་པོ་ཆེ་དང་སྨན་སྣའི་ཚོགས་ཀྱི་ཕྱེ་མ་འཇིམ་པར་བསྲེས་ནས་རྗེ་བཙུན་རིན་པོ་ཆེ་གྲགས་པ་རྒྱལ་མཚན་གྱི་ནང་རྟེན་འཇམ་དབྱངས་གཟི་འོད་འབར་བའི་སྐུ་དབྱིབས་འདྲ་གང་ལོན་མཛད་ནས་རིང་བསྲེལ་རྣམ་བཞིས་ཕྱུར་བུར་བཀང༌། རབ་ཏུ་གནས་པའི་བྱིན་རླབས་ཀྱི་གཟི་བྱིན་གཡོས་ཏེ་བཞུགས་སུ་གསོལ་བ་དང༌། ཡང་ཨ་ཎིའི་དྲུང་ཀུན་དགའ་བསྟན་པའི་ཉི་མ་དང་རྗེ་ཉིད་ཀྱི་ཡུམ་མཆོག་བསོད་ནམས་དཔལ་གྱི་དབང་མོ་ཟུང་གི་ནང་རྟེན་དངུལ་གདུང་རིན་པོ་ཆེ་བྱང་ཆུབ་མཆོད་རྟེན་ཕྱག་ཚད་ཅན་དབུ་ཞབས་བར་གསུམ་གྱི་གཟུངས་རིང་བསྲེལ། སྐུ་གཤེགས་ཟུང་གི་གདུང་འདམ་ལ་སཙྪ་བླ་མ་ཡི་དམ་སངས་རྒྱས་བྱང་སེམས་ཆོས་སྲུང་ནོར་ལྷའི་སྐུ་པར་གྲངས་མང་བསྐྲུན་པ་སོགས་ཀྱིས་གཏམས་ཏེ། ཕྲ་རྒྱན་མཆོད་