[A:༡༨༤]རྫས་དང་བཅས་ངོ་མཚར་འཕྲུལ་གྱི་བཀའ་འདོམས་ཚར་ཕྱིན་མཛད་རྗེས། དམ་ཡེ་དབྱེར་མེད་དུ་བྱིན་གྱིས་བརླབས་ཏེ་ལུས་ཅན་བསོད་ནམས་གསོག་པའི་ཞིང་མཆོག་དམ་པར་མིག་གི་སྤྱོད་ཡུལ་དུ་གསལ་བ་འདི་དང༌། གང་གི་དབུ་བླ་ཐར་རྩེ་རྡོ་རྗེ་འཆང་ནམ་མཁའ་བསམ་འགྲུབ་ཀུན་དགའ་མཚན་དཔེའི་རྒྱལ་མཚན་དཔལ་བཟང་པོའི་སྣང་བརྙན་སྨན་འདམ་ལས་གྲུབ་པ་རིང་བསྲེལ་རྣམ་བཞི་སྤྱི་དང་བྱེ་བྲག་གིས་ཕྱུར་བུར་མཛད། མི་བསྐྱོད་རྡོ་རྗེའི་ཕྱག་ཅན་དུ་བཞུགས་པ་དེ་ཉིད་འདུས་ཚོགས་ནས་རབ་ཏུ་གནས་པའི་མེ་ཏོག་ཚར་ཁ་ཤས་དང༌། རྗེ་ཉིད་ཀྱིས་ཀྱཻ་རྡོ་རྗེ་ལ་བརྟེན་པའི་རབ་ཏུ་གནས་པའི་མེ་ཏོག་གནད་སྨིན་ཕུལ་དུས་ཀྱི་གསུང་ལས། ཡེ་ཤེས་སེམས་དཔའ་ཕེབས་པའི་རྟགས་ཀྱང་ཤར་བས། དགོས་འདོད་རེ་སྐོང་འདི་ཉིད་ལ་རྗེ་དེ་རང་གི་དབུ་ཞྭ། གོས་བེར་ཞལ་དཀར་སྟེགས་བཅས། སྤྱི་བླུགས། འཐོར་སྣོད། རྡོར་དྲིལ། ནང་མཆོད། ཐོད་ཊཱ། བུམ་པ་སོགས་བསོད་ནམས་ཀྱི་ཞིང་མཆོག་དེར་ཕུལ་བ་ཡིན་ཅིང༌། རྗེ་དེའི་སྐུ་དྲིན་ནི་ནམ་དུ་ཡང་ཁྱེར་མཐའ་མ་མཆིས་སོ། །རྒྱུ་མཚན་ཅིའི་ཕྱིར་ཞེ་ན། ཡབ་རྡོ་རྗེ་འཆང་དེ་ཉིད་ཞི་བར་གཤེགས་དུས་རང་ཉིད་བྱིས་པ་ན་ཕྲ། ལུགས་གཉིས་ཀྱི་བླང་དོར་ལ་རྨོངས་པའི་དུས། ཆོས་འཇིག་རྟེན་གྱི་མགོ་འདོན་ཚང་མ་དམ་པ་འདིའི་སྐུ་དྲིན་གྱིས་བསྐྱངས་པའོ། །ཞེས་གསུངས། གོང་སྐུ་གཤེགས་ཟུང་གི་ནང་རྟེན་འཇམ་དབྱངས་སྣང་བརྙན་དང༌། དངུལ་གདུང་ཕྲ་རྒྱན་ཅན། ཐར་རྩེ་རྡོ་རྗེ་འཆང་གི་སྨན་སྐུ་བཅས། དེ་སྐབས་བླ་བྲང་ཤར་ན་བཞུགས་པ་