[A:༡༨༦]ལུང་དུ་རྒྱལ་ཡུམ་སྐུ་དྲིན་ཅན་མ་དེ་ཉིད་སྤྱན་འདྲེན་པར་མངགས་ཏེ། ཆུ་སྟོད་ཟླ་ནང་གསང་ཁོག་ནས་གདན་སར་ཕེབས་པར་བཅོམ་ལྡན་འདས་དཔལ་གསང་བ་འདུས་པ་མི་བསྐྱོད་རྡོ་རྗེའི་རྡུལ་དཀྱིལ་དུ་སྨིན་པར་མཛད་དེ་རྗེས་སུ་གནང་བ་དུ་མ་དང༌། ལྷ་སྐུ་བདེ་སྟོང་དབྱེར་མེད་དོན་དམ་པའི་གཤིས་ལས་མ་གཡོས་ཀྱང་ལྟར་སྣང་མཐུན་སྡེབ་ཀྱི་ལ་ཉེ་ཤར་བའི་རིམ་གྲོ་རྣམས་རིམ་བཞིན་མཛད། གྲོ་བཞིན་ཕུར་སྒྲུབ་དང་བསྟུན་ཕུན་གླིང་དུ་ཐོ་རེངས་སྔ་བར་ཕེབས་སྐབས་ཤིག་རྗེ་ཉིད་ཀྱི་འོད་གསལ་དུ་རྒྱལ་ཡུམ་ཉིད་དང་ལྷན་དུ་བརྩེ་ཆེན་ལྷ་ཁང་དུ་ཕེབས་སོང་བར། གཟིམ་ཆུང་གི་སྒོ་འགག་དེ་ན་རྣལ་འབྱོར་པ་རུས་པའི་རྒྱན་ཅན་བག་དྲོ་བ་ཞིག་བཞུགས་འདུག་པ་དེས་སྣ་དྲངས། བརྩེ་ཆེན་ལྷ་ཁང་ས་ཆེན་སྐུ་འདྲ་རིན་པོ་ཆེར་ཡབ་ཡུམ་ནས་ཕྱག་གནང་སྟེ་ཡབ་ཀྱིས་ཡུམ་ལ་རྟེན་བཤད་གནང་རྩིས་ཀྱིས། ཕུན་སུམ་ཚོགས་པ་མངའ་བ་གསེར་གྱི་རི་བོ་འདྲ། ཞེས་སོགས་བཀྲ་ཤིས་ཀྱི་ཚིགས་བཅད་གསུམ་སྔོན་འགྲོའི་རྟེན་བཤད་མཛད་སྐབས་སྐུ་འདྲ་རིན་པོ་ཆེ་གཞན་ལས་གསལ་ཞིང་དགྱེས་ཉམས་ཆེ་བ་ཞིག་འཁྲུངས་པ་ནི། ཡབ་ཡུམ་སྐུ་དྲིན་ཅན་ལས་གདུང་རྒྱུད་རིན་པོ་ཆེ་ཞལ་རྣམ་པ་གཉིས་འབྱོན་པའི་སླར་འབྱུང་གི་རྟེན་འབྲེལ་བླ་ན་མེད་པར་ཡིད་གཉིས་དང་བྲལ། ཁྲུམས་ཟླའི་སྟོད་ལ་གོང་གི་གསེར་སྐུ་རྡོ་རྗེ་འཆང་ཡང་ཚར་ཕྱིན་ནས། ནང་གཟུངས་ཀྱི་གཙོ་བོ་གུ་རུ་རིན་པོ་ཆེའི་སྐུ་ཚབ་གཏེར་ལྔའི་ནང་ཚན་བྱེ་མ་ཨ་ཀྲོང་གི་སྐུ་གུ་རུ་ཡབ་ཡུམ་གྱི་བྱང་སེམས་དཀར་དམར་འདྲེས་ཤིང་ཕྱག་ནས་མ། རིང་བསྲེལ་