[A:༡༩༥]བསྟན་གདུང་རབས་མྱུར་འབྱོན་སྐུ་རིམ་དུ། གྲ་ལྔ་དང་དམར་པོ་སྐོར་གསུམ་གྱི་སྐུ་པར་གྲངས་མང་དང༌། དེ་དག་གི་སྐུ་གང་ལེགས་བཞེངས་དགོས་བབས་པ་བཞིན། གྲ་ལྔ་ལུགས་སྐུ་རྣམས་སྡེ་དགེར་ཡོན་སྦྱར་གྱིས་ཞུས། གོང་གི་སྐུ་པར་གྲངས་མང་དེ་དག་གདུང་རབས་མྱུར་འབྱོན་ཆེད་དམར་པོ་སྐོར་གསུམ་བཞེངས་རྒྱུའི་བཅའ་སྒྲིགས་ལ་རྟེན་འབྲེལ་རང་འགྲིག་ལྟ་བུར། དེ་དག་གིས་མཚོན་སྐུ་པར་མང་པོ་དེ་སྔོན་ནས་གསར་བླུགས་གྲུབ་འཕྲལ་ཡིན་པ་བཞིན། བརྒྱ་སྟོང་སོགས་ཕྱག་བཏབ་གྲངས་མང་དང༌། སྐུ་རྒྱུར་བྱིན་རླབས་རྟེན་འདམ་མཚལ་སོགས་དབང་རྫས་དམར་པོ་སྣ་འཛོམ་འཇིམ་གཙང་ལ་བྱིན་རླབས་མཛད་པ་དང་བསྲེས་ཏེ། ཚོམ་བར་མགོན་ཁང་དུ་ཚུལ་ཁྲིམས་བཀྲ་ཤིས་སོགས་ནས་ཤིན་ཏུ་གསང་བར་བཞེངས་ཏེ། ཐུན་མོང་དང་ཐུན་མོང་མ་ཡིན་པའི་གཟུངས་བཅས་སྣྲོན་ཟླའི་འགོར་གྲུབ་འཕྲལ་རྗེ་ཉིད་ཀྱིས་ཕྱག་ནས་ཚར་གཅིག་དང༌། ཆོས་ལས་པ་བསྟན་འཛིན་རིན་ཆེན་གྱིས་བརྒྱ་ཚར་མཛད། གཞན་ཡང་གདུང་རབས་མྱུར་འབྱོན་ཆེད་མཁར་ཐུབ་བསྟན་དགེ་འཕེལ་དུ་ལྷོ་བྱང་དགེ་འདུན་བརྒྱད་གྲྭས། རྗེ་བཙུན་རིན་པོ་ཆེའི་བླ་མའི་རྣལ་འབྱོར་དང་འཕྲིན་བཅོལ་སོགས་ཟླ་གཅིག་གི་རིང་བགྱིས། ཟླ་མཇུག་ཏུ་བརྩེ་ཆེན་ལྷ་ཁང་རྒྱ་ཆེར་བསྐྲུན་པར་མཛད་པ་དང༌། ཆུ་སྟོད་ཟླ་ནང་ཕུར་སྒྲུབ་འཕྲིན་འཆོལ་གང་ཙམ་ལ་རི་ནག་རྩེར། བྱེ་མ་ངུ་བའི་ཁ་གནོན་གྱི་རིགས་གསུམ་མཆོད་རྟེན་གསར་བསྐྲུན་དང༌། སྐྱེད་ལྷས་ཕྲིན་འཆོལ་ལ་ཡུམ་གྱི་གནས་གཟིགས་ཆེད། ཡབ་ཡུམ་ལྷན་དུ་ཕེབས་ཏེ་