[A:༡༩༦]བྱེས་འགྱུར་དུ་ནུབ་གཅིག་བཞུགས། གནས་གཟིགས་གྲུབ་ནས་མར་ལམ་ལྷ་འཕྲེང་ལྟ་བུའི་རྒྱུ་མ་ལམ་གྱི་སྐེད་ཙམ་ཕེབས་དུས། རྦབ་རྒྱུགས་ཤིག་བྱུང་ཡང་མ་སྐྱོན། བསམ་བརླིང་དུའང་ཞག་གཅིག་དང་མར་ལམ་རི་ནག་རྩེར་མཆོད་རྟེན་རྣམས་ལ་ཕྱག་ནས་འབྲིང་པོ་མཛད་རྗེས། རི་བྱ་སྡེར་མའི་ལྟག་ཙམ་དུ་ཕེབས་དུས། ནམ་མཁའ་དབྱིངས་ཤིན་ཏུ་དྭངས་པར་དབོན་པོ་རིའི་ཐད་དུ་སྤྲིན་དུམ་ཞིག་འདུས་ཏེ་ཟིམ་ཆར་འབབ་པ་དང༌། བྲག་ཆུང་ནས་བདེ་གླིང་ལྕགས་རིའི་བར་འཇའ་ཚོན་འོད་སྐོར་ལྟ་བུ་ཞིག་ཀྱང་ཤར་བས་ཐུགས་ལ་ཡ་མཚན་ཆེ་བ་ཞིག་འཁྲུངས། གྲོ་བཞིན་ཕུར་སྒྲུབ་གྲོལ་ནས་སླར་ཡང་གྲྭ་ལྔ་སྒྲུབ་མཆོད་དྲུག་ཅུར་ཉེ་བར་གསོག་གནང་གིས། ཡུམ་ལ་དབང་གྲངས་གསོག་མཛད། དེ་སྔོན་ནས་སྡེ་དགེ་ཞུ་ཆེན་རིན་པོ་ཆེས་གཟིམ་ཆུང་འཕྲོད་མིན་ཡང་བརྟག ངོས་གདུང་རྒྱུད་མྱུར་འབྱོན་གང་ཅིའི་མཚམས་ལ་ཐུགས་བསམ་ཆེར་བསྐྱེད་དགོས་ཚུལ་གནང་བ་བཞིན། ཡབ་རྗེ་རྡོ་རྗེ་འཆང་གི་གཟིམ་ཆུང་འཆི་མེད་རྡོ་རྗེའི་གུར་ཁང་རྒྱ་བསྐྱེད་དེ། རྟེན་འབྲེལ་ཁྱད་ཞག་བཅུ་སྐོར་ལ་ཚར་ཕྱིན་པར་མཛད། མཚན་ཡང་འཛམ་གླིང་ཕུན་ཚོགས་དཔལ་འབར་དུ་གསོལ་ཏེ། གུ་རུ་དྲག་དམར་སྒྲུབ་མཆོད་ཀྱིས་ཐོག་མར་བྱིན་གྱིས་རླབས། དེ་རྗེས་རྡོ་རྗེ་ཕུར་པའི་རས་དཀྱིལ་སྒྲུབ་མཆོད་ཀྱང་མཛད་པས་བྱིན་ཆགས་ཤིང་ཐུགས་བག་ཕེབས་པ་བྱུང་གསུངས། ཁྲུམས་ཟླའི་ཉེར་གཅིག་ལ་དཔལ་ས་སྐྱའི་རྒྱབ་རི་སེངྒེའི་གདོང་ཅན་གྱི་མིག་གཡོན་མཚོན་བྱེད་བྲག་འབུར་ཐད་ནས་གློ་བུར་དུ་ཞིག་རལ་བྱུང་བར་ཀུན་ཐུགས་