[A:༢༣༩]བཅས་ནས་མཛད། རྒྱུད་བླ་མཆོད་སོགས་ལ་ཕེབས་རྟག་གི་མུར་དབོ་ཟླ་ཉིས་བརྩེགས་ལ་གཞུང་པའི་སྐུ་རིམ་བེཀྩེའི་གཏོར་བཟློག་དང་འཆར་ཅན་ཕུར་བཟློག་ལའང་ཕེབས་ཤིང༌། ཟླ་འདི་ནས་བཟུང་ཇི་སྲིད་བསྐལ་པའི་བར་སྡོམ་གསུམ་ཚེས་མཆོད་གཞུང་སྐྱོར་ཟླ་རེར་ལན་གསུམ་རེ་ཆག་མེད་ཀྱི་རྒྱུན་བཟང་འདི་ཉིད་གསར་འཛུགས་བཀའ་དྲིན་ཆེ་སྟེ་ཚོགས་དབུར་བྱོན། ནག་ཟླའི་ནང་ཁ་སྐོང་ཚེས་མཆོད་ཀྱང་སྡོམ་གསུམ་དང་འདྲ་བར་གསར་འཛུགས་དང༌། དེ་ནས་དམ་ཚིག་བསྐང་གསོར་ཕེབས་གོང་ཙམ་དུ་ཆོས་ལུང་ནས་སྐུ་ཞང་རྒྱལ་པོ་རྣམས་དང༌། སྲས་ཡུམ་སྲས་མོ་དཔོན་གཡོག་བྱོན་པས་སྔར་བཞིན་གང་སར་བདག་རྐྱེན་ཡང་དག་དང༌། ཚེ་དབང་སྟོན་མོ་སོགས་ཟབ་རྒྱས་སུ་བསྟར་བ་མཛད་པས་ཁོང་དཔོན་གཡོག་ཀྱང་དགའ་མགུ་ཡི་རང་སྟེ་སླར་ལྡོག ས་གའི་གསང་འདུས་མགོན་མདོས་སྣྲོན་ཟླའི་ལྷ་མོ་མཆོད། བདེ་ཀྱཻ་སྒྲུབ་མཆོད་སོགས་ལ་ཕེབས་མུ་དང༌། ལྷག་པར་རྗེ་ཉིད་ནས་སྔར་ཕན་མུས་ཆེན་མཆོད་འབུལ་ལ་མ་ཕེབས་ཀྱང་དེ་ལོ་ནས་བཟུང་ཕེབས་ཏེ་འཇམ་མགོན་ཨ་མེས་ཞབས་ཡབ་སྲས་ཀྱི་སྐུ་ཐོག་བཞིན་ཆོས་སྤྱོད་བར་གདངས་སོགས་དེབ་སྒྲིགས་ཀྱིས་ད་ལྟའི་ཉིན་འཁྱོངས་མའི་རྒྱུན་བཟང་འདི་མཛད་ཅིང༌། ཆུ་སྟོད་སྒྲུབ་མཆོད་དང་ལོ་བཅོལ་སོགས་ལའང་བྱོན། དུས་གཏོར་ཆེན་མོ་དགུང་གྲངས་ཉེར་གཉིས་ནས་བཟུང་ཆག་མེད་མཛད་ཀྱང་བན་ཚང་པ་དང་ལྷན་ཅིག་སྒྲུབ་མཆོད་གཏོར་བཟློག་སྐབས་མ་གཏོགས་མགོན་ཁང་སོ་སོར་མ་གནང་ཡང༌། དེ་དུས་ལྷ་ཁང་རྩེར་ཕེབས་པ་ནས་བཟུང་ཕལ་ཆེར་ལྷན་དུ་