[A:༢༤༥]བཀའ་འདོམས་མཛད་ནས། རྗེ་ཉིད་ཀྱི་རྣམ་འཇོམས་ཀྱིས་གཟུངས་བཟླ་ཞིང་བུམ་ཆུ་འཐོར་བཞིན་པས་སྣ་དྲངས་ཏེ་སྤྱན་འདྲེན་སྐབས། ལྕིད་མེད་ལྟར་བདེ་བར་ཡེར་གྱིས་མགོན་ཁང་ཆེན་མོར་ཕེབས། ཞབས་ལ་ཉམས་གསོའི་སྐབས་རྗེ་ཉིད་སྐུ་འཁོར་རགས་བསྡུས་ཀྱིས་ནང་སོ་འཕགས་པ་རིན་པོ་ཆེའི་ཕྱག་ནས་གུར་མགོན་ལྕམ་དྲལ། སྨུག་ཆུང་ཞལ་འབག་སོགས་རིམ་བཞིན་སྤྱན་འདྲེན་དང༌། དེ་ནས་ཡིག་བརྒྱ་ལྗགས་བཟླས་སུ་མཛད་བཞིན་པར་ཟངས་ཆེན་བླ་མཚོ་ནས་ཟངས་ཤུ་གང་ཆུ་ཚགས་ལ་འདྲེན་པར་གནང༌། དེ་ནས་གསོལ་གཟིམ་གཉིས་ཀྱིས་བཅུས་ཏེ་བན་ཚང་པས་བཀྱེ་སྐབས་ཀྱང་ཉོག་ཐམས་ཅད་རས་ཚགས་སུ་བཟུང་ཞིང་རྫོགས་དུས་མེད་པ་ལྟ་བུ་བྱུང་ཞེས་གསུངས། སྔོན་སྔགས་འཆང་ཆོས་ཀྱི་རྒྱལ་པོས་མགོན་ཁང་དེའི་ཤར་ནས་ཟངས་ཆེན་ནུབ་ཏུ་གདན་དྲངས་པ་ནས་བཟུང་རྗེ་རྡོ་རྗེ་འཆང་ཆེན་པོ་ཉིད་དགུང་གྲངས་སོ་དགུ་ནས་བཞི་བཅུ་པ་འདིའི་བར་དུ་སྒུལ་བསྐྱོད་ཡེ་མ་མཛད་པས། ལོ་ཡུན་རིང་པོའི་བར་གྱི་བདུད་རྩི་རིལ་འདམ་དང་ཆུ་དྲག་སོགས་ཉོག་གཙང་རྣམས་ཕྱོགས་གཅིག་ཏུ་བཟླུམས་པར་མཛད། སེ་མོའི་རོ་ས་བྲེ་གང་གི་ཚོད་ཙམ་ལ་གཞན་ཕལ་ཆེར་སེ་རོ་རང་དུ་ངོས་འཛིན་གནང༌། རྗེ་ཉིད་ཀྱི་ཐུགས་ལ་ནི་བླ་མཚོའི་མཚན་ལ་ཁྲག་མཚོ་བཀྲ་ཤིས་འོད་འབར་དུ་ཞུ་བས་ན། རྣམ་པ་གདུག་ཅན་ཁྲག་རྒྱུན་འཁྱིལ་བ་ལ་ངོ་བོ་ཡེ་ཤེས་ཀྱི་བདུད་རྩིའི་རྒྱ་མཚོ་དམ་ཅན་འདུ་བའི་ཆུ་ཀླུང་ཆེན་པོར་ངོས་འཛིན་དགོས་པས་ན། དགྲ་བགེགས་ཀྱི་རོ་རང་ཡིན་དགོངས་པ་དོན་ལྡན་དུ་འཁྲུངས། ཆུ་ཕལ་ཆེར་