[A:༢༩༡]ཉེར་བརྒྱད་ལ་གནང་བའི་ཉེར་དགུའི་ཐོ་རེངས། ཟུར་འཆད་གྲུབ་དབང་རྗེ་དྲུང་ལགས་ནས་རྗེ་ཉིད་ལ། མང་ཐོས་ཀླུ་སྒྲུབ་རྒྱ་མཚོའི་གསུང་འབུམ་ནང་གི་མགོན་པོའི་རྗེས་གནང་དེ་གནང་དགོས་ཞུ་བར། དེ་འདྲ་ཞིག་ཡོད་དགོངས་དབང་ཁང་དུ་གནང་སོང་བས་མངོན་རྟོགས་ནི་དཀྱུས་མ་དང་། སྔོན་འགྲོའི་གསུང་བཤད་ལ་འཕགས་པ་ཀླུ་སྒྲུབ་ཀྱིས་རྒྱུད་ལས་བཏུས་ནས་འདི་མཛད། མན་ངག་རྣམས་རྡོ་རྗེ་འཆང་དང་མགོན་པོ་དངོས་ལ་གསན། དེ་ནས་བྲམ་ཟེ་མཆོག་སྲེད་ནས་བརྒྱུད་རྗེ་བཙུན་ས་སྐྱ་པར་བཀའ་བབས། སྤྱིར་མགོན་པོ་འདི་ལ་རྗེས་གནང་དང་དབང་བཀའ་ཁ་ཤས་ཡོད་པ་ལས། འདི་གུར་མགོན་ཁྲོ་བཅུའི་གཙོ་བོ་དེའི་རྗེས་གནང་ཡིན་གསུང་བ་ཞིག་འཁྲུངས་པས། ཐུགས་ལ་སྔར་རྗེས་གནང་དེ་འདྲ་གསན་པ་དང་མཛད་པ་ནི་མ་དྲན། ཀླུ་སྒྲུབ་བཀའ་འབུམ་ནའང་ཡོད་མེད་མ་ཤེས། གང་ལྟར་འཆམ་སྐུ་གསར་ཕེབས་འདིའི་ཆོ་འཕྲུལ་ཞིག་ནི་ངེས་པར་ཡིན་འདུག་པས་བཟང་ངན་དཔྱོད་དཀའ་མོ་ཞིག་འདྲ། ཞེས་གསུངས། ཀླུ་སྒྲུབ་བཀའ་འབུམ་ན་མགོན་པོའི་རྗེས་གནང་གི་ཟིན་བྲིས་ཤིག་ནི་མཆིས་ལགས་སོ། །དེ་ལོ་གྲོ་བཞིན་ཕུར་སྒྲུབ་ལ་འཇམ་མགོན་ཨེ་ཝཾ་བཟང་པོ་འདི་ཉིད་ཐོག་མར་ཕེབས་རྒྱུ་དང། སྲི་གནོན་ལྗགས་བསྒྲིགས་མའང་ཐོག་མར་གནམ་གང་ཉིན་མཛད་རྒྱུ་བཅས། གདན་སའི་རྩིས་པ་རྣམས་དང་སྐྱེ་རེ་བ་སོགས་ནས་དེའི་བཅོ་ལྔའི་ཟླ་འཛིན་དང། དེ་ནས་གནམ་གང་ལའང་ཉི་འཛིན་ཡོང་བར་ཐག་བཅད་ཀྱང་གཏན་ནས་མ་བྱུང་བ་ནི། སྔོན་དུས་རྗེ་བཙུན་གྲགས་པ་རྒྱལ་མཚན་དང། འདུལ་