[A:༣༨༦]ཡང་གཞན་ལས་རིང་བ་བྱུང་བར། རྗེ་ཡབ་སྲས་རྣམས་ནས་འཛིན་པར་མཛད་པ་ཡང་གླེང་བ་བྱུང་། དེ་སྔོན་གཞི་ཐོག་རྩེར་སྐུ་ཡོན་ཁང་གསར་བསྐྲུན་མཛད་པར་དབྱུག་ཟླའི་ཉེར་གསུམ་ནས་བདུན་ཕྲག་གཅིག་ཕུར་སྒྲུབ་རྡུལ་དཀྱིལ་སྟེང་ནས་ཉིན་གང་མ་མཛད་སྐབས། གཉའ་ནང་ཤོ་དཔོན་ཇིའི་སང་ཁ་ཤ་ཁའི་སྲས་དཔོན་གཡོག་ལྕགས་སོགས་དངོས་པོ་མང་པོའི་འབུལ་ཆ་དང་བཅས་འབྱོར་ཞིང་། ཇིའི་སང་ལ་བྱང་ཆོག་ཀྱང་གནང་། སྨིན་ཟླའི་ཚེས་གཅིག་ལ་རྩེ་ཐབ་པར་ཐབ་བཅས་ཉམས་གསོ་གྲུབ་པའི་རྩེར་ལྷ་བསངས། ཐབ་གོང་འོག་ཏུ་ཁྲུས། མདོ་ཀློག་པ་རྣམས་བན་ཚང་དབུ་བྱེད་ཟུང་ལ་བཀས་མངགས། དེ་ནས་བྱིན་རླབས་ཀྱི་གཟི་འོད་འབར་བར་མཛད་པའི་སྐུ་ཡོན་ཁང་དུ་འཇམ་མགོན་གཞོན་ནུར་གྱུར་པ་སྐུ་མཆེད་ས་ཞུ་བཞེས་ཏེ་ཐོག་མར་ཞལ་དྲོའི་རྟེན་འབྲེལ་ཚར་དུ་དངར་བ་དང་བཅས་ཕེབས་སྐབས། སྔ་དྲོར་ཁ་བ་ཉིལ་བ་དང་ཉི་འོད་གསལ་བ་གཉིས་ཀ་བྱུང་བ་ནི་ཕུགས་ཀྱི་དགེ་མཚན་ངོ་མཚར་ཅན་དང་། གནས་དེར་ཕུར་པའི་ཞི་བའི་སྲེག་བླུགས་ཀྱང་མཛད་རྗེས། ཡབ་རྗེ་རིགས་བརྒྱའི་ཁྱབ་བདག་མཆོག་ནས་གསོལ་ཐབ་ཡས་མས་སུ། རབ་གནས། རྣམ་འཇོམས། ཚོགས་བདག་གསུང་བསྐང་བཅས་དང་། སྐུ་ཡོན་ཁང་དུ་རྟེན་མཆོད་རྒྱུན་བཞུགས་སྟེང་དམིགས་བསལ་འཇམ་དབྱངས་རྩོད་རྒྱལ་མ། བླ་མ་གོང་མའི་རྒྱ་དཔེ་གླེགས་བམ། རྣམ་རྒྱལ་མཆོད་རྟེན། སྒྲོལ་མ་གཙུག་ལག་ཁང་སྟེང་མའི་ཚེ་དཔག་མེད་ལྷ་དགུའི་རྟེན་གཙོ་སངས་རྒྱས་ཚེ་དཔག་མེད་སོགས་མཆོད་ཚོགས་དང་བཅས་པར་ཚེས་