[A:༦༢༧]ལེན་དུ་ཤར་མར་སྡེབས་པ་དེ་ལྟར་ལགས་ཀྱང་བདག་གི་བླ་མ་དེ་ཉིད་ནི་གོང་མ་རྣམས་ལས་ལྡོག་ཏེ་ཅི་ཡང་མི་མཁྱེན་པའི་ཚུལ་ཁོ་ན་སྟོན་པར་མཛད་དེ། གོ་དོན་སོགས་ཀྱི་ཆ་འགའ་ཞིག་ལ་བཀའ་འདྲི་ཞུས་ཀྱང་ཚུར་འདྲི་བ་སྐད་མཛད་པ་དང་ངེད་ལ་མངོན་ཤེས་མེད་ཅེས་རྒྱུན་བར་བཀའ་སྩོལ་ཞིང་ནན་ཏར་ཞུས་ན་ཤོ་མོ་གཟའ་བདུན་འཁོར་སྤར་མོ་སོགས་མཛད་དེ་གང་བབས་གསལ་བར་གསུངས་པར་ཐོས་ཤིང་ཡང་སྙིང་གང་གསུངས་ཐམས་ཅད་ཐོག་ཏུ་འབབས་ཡོང་ཞིང་། དབང་རྗེས་གནང་ཁྲིད་ལ་སོགས་མང་པོ་སྔོན་གྱི་དཔེ་རྙིང་འཆིངས་མདོར་བསྡུས་ཙམ་ཡར་ལེན་མར་ལེན་མང་དུ་དགོས་པ་རྣམས་ཀྱང་ཆད་ལྷག་མེད་པར་ཐོགས་མེད་དུ་གསུངས་པ་ལས་ཐེ་ཚོམ་ཅུང་ཟད་ཀྱང་མི་མངའ་ཞིང་། ལྗགས་ལུང་གནང་སྐབས་ཧ་ཅང་མྱུར་ཆེས་པས་ཚིག་མི་གསལ་བ་དང་དལ་ཆེ་བས་མི་ལྷོགས་པ་ལྟ་བུ་མ་ཡིན་པ། ཚིག་སྒྲ་དག་ཅིང་གསལ་བ་རིང་ཐུང་གཅོད་མཚམས་རྣམས་བར་འབྱེད་ཅིང་། སྐབས་རེ་ཆོས་ཞུ་བ་རྣམས་ལ་གཟིགས་ཤིང་བཞད་མོ་མཛད་བཞིན་དུ་ཐལ་ལེ་གསུངས་པས། པོ་སྟི་གཅིག་ཙམ་ཚེགས་མེད་པ་སྲིབ་ཙམ་ལ་གནང་གྲུབ་ཡོང་བ་སོགས་ངེས་དོན་གྱི་རྗེ་བཙུན་མ་འདི་ལྟ་བུ་ནི། ཁོ་བོས་ཀྱང་དབུས་གཙང་ཁམས་གསུམ་གང་དུ་སྔར་ཕན་མཐོང་མ་མྱོང་ཞིང་། དབང་ཆེན་རྣམས་དང་རྗེས་གནང་བྱིན་རླབས་སོགས་གང་མཛད་ཀྱང་སླ་ཆོས་གཏན་ནས་མི་མཛད་པར། འགོའི་མཆོད་བཤམས་སོགས་ནས་བཟུང་མཇུག་ཆོག་བར་ལ་གཞུང་ནས་བཤད་པ་བཞིན་ནན་ཆེར་མཛད་དེ། དབང་ཆེན་སོགས་ལ་