[A:109]snang ba byung / 'dam ko khyim du lha mo che'i rab gnas la spyan drangs su/ lha de la gdon gcig zhugs nas rab gnas mkhan po gzhan sus kyang ma thon pa la/ bgegs skrod mdzad pas dngos su lha'i mchan khung nas phug ron gnyis 'phur nas/ pha chod nas spyang ki zung tshub dang bcas par song ba kun gyis mthong / de nas rab gnas mdzad pas rab gnas legs zer ro/ /'di ni dge ba'i bshes gnyen khyad du 'phags pa zhig yin te/ bla ma dam pa 'phags pa gong du byon pa'i dus su/ dbus kyi dge ba'i bshes gnyen thams cad kyis 'dam du mjal ba la byon pa'i dus su/ lha rin po che dang gsung gleng mang du mdzad pas thugs shin tu dgyes nas/dbus kyi rin po che gzhan rnams 'dam nas log pa la/ lha rin po ches nged kyis skyel thung mdzod gsungs nas sha po bar du byon/khyed lta bu'i dge ba'i bshes gnyen dang 'bral mi phod par 'dug gsungs/ bya ba la sogs pa'i gtam rgyud 'dug mdor na de lta bu ngo mtshar rgyu mtshan bsam gyis mi khyab pa dang / bstan pa'i phrin las mkhas btsun bzang gsum gyi slob ma du ma dang / mi che ba'i slob ma zam kha ching sang la sogs pa mang du byung / bstan pa'i mnga' bdag dang / sems can mang po smin par mdzad nas lug lo ston zla tha chung gi nyi shu gcig la ngo mtshar ba'i ltas du ma dang bcas te spyil bur bde bar gshegs/ lha sku la sogs rten ngo