[A:136]par sangs rgyas kyi bstan pa rin po che gnas pa'i sa phyogs kha ba can gyi ljongs 'dir hor dmag la sogs pa'i gnod pa med par mdzad cing/ stobs kyi kha los sgyur ba se chen gan dang bla ma 'phags pa yon mchod du 'brel nas/ bstan pa rin po che la phu dud du zhabs tog byed du bcug nas/ bde bar gshegs pa'i bstan pa ches gsal bar mdzad pa yin te/ de lta bu'i bka' drin can gyi gdung rgyud kyi mdzad pa dang lo rgyus ni gdan sa chen po na yod pa'i mkhan gyi yig tshang rnying pa na 'di ltar snang ste/ gdung rgyud rin po che 'di dang por lha las chad/ de'ang thog mar gnam lha mched gsum byon pa'i che ba gnam lha spyi ring / bar pa gnam lha g.yu ring / chung ba gnam lha dbu se zhes bya'o/ /de rnams la mi rje zhus pas/ chung ba de mi yul du byon/ mi'i rje mdzad/ de la sras bzhi byung ste/se byi li spun bzhir grags so/ /de rnams kyis ldong rus chen bco brgyad dang 'thabs skad/ de'i grogs la gnam lha g.yu ring byon/ldong rus chen bco brgyad btul nas bran du bkol skad do/ /'o na gdung rgyud 'di gang las 'dod na/ gnam lha g.yu ring gis dmu'i bu mo dmu za ldem bu khab tu bzhes pa la sras bdun byung ste/ ma sangs spun bdun du grags so/ /gcen drug yab dang bdun lha yul du gshegs so/ /chung shos des thog lha 'od chen gyi bu mo thog lcam 'ur mo bya ba khab tu bzhes pa'i sras thog tsha dpa' bo stag yin no/ /des