[A:156]gshegs so/ /bdag nyid chen po'i btsun mo red mda' ma lha gcig nyi ma rin chen zhes bya ba la lcam sring gsum 'khrungs pa'i che ba de gzhon nu la bde bar gshegs so/ /de'i 'og ma slob dpon ma kun dga' 'bum 'khrungs so/ /chung ba de la slob dpon chen po dbang kun dga' legs pa'i rgyal mtshan dpal bzang po zhes bgyi ste/'di nyid yab dgung lo zhe bdun bzhes pa'i dus sa pho spre'u lo la sku 'khrungs nas/ dgung lo nyi shu bzhes pa'i dus me pho byi ba lo la srad kyi sa cha klub tu gshegs so/ /bdag nyid chen po'i btsun mo zha lu ba ma gcig gzhon nu 'bum zhes bgyi la/ sras gsum 'khrungs pa'i che ba de la slob dpon chen po ta'i dben gu shri kun dga' nyi ma rgyal mtshan dpal bzang po zhes bgyi ste/ rgyal po'i bla mchod mdzad/ta'i dben gu shri'i mtshan gsol/ chu pho khyi lo la pho brang chen por ngo mtshar ba'i mdzad pa du ma bcas te bde bar gshegs so zhes grag go /bla ma de'i gcung bla ma dam pa don yod rgyal mtshan dpal bzang po zhes bgyi ste/ bla ma 'di nyid yab dgung lo zhe dgu bzhes pa'i dus lcags pho khyi lo la 'khrungs so/ /de lta bu'i bla ma 'di ni nges par 'jam dpal dbyangs yin te/ gdul bya dag pa 'ga' res 'jam dbyangs seng ge la chibs pa dngos su mthong zhes grags la/ dgung lo so lnga bzhes pa'i dus shing pho spre'u'i lo zla ba lnga pa'i tshes bcu gcig la ngo mtshar ba'i ltas du ma dang bcas nam mkha'i