[A:41]skya bseng dang dmag brgya pa gnyis nub gcig la skyes te/ rgyal srid la ma 'cham pa'i dus su / dmag brgya pa'i btsun mo dam pa la bu mig mas kyis 'gebs pa/ g.yu'i smin ma can/ tshems dung so 'khor ma/ phyag sor dra bas 'brel ba/ mtshan dang ldan pa gcig byung ba de yin par bshad/ lo tstsha ba bu ston gyis mdzad pa'i chos 'byung chen mor/ ko sa la'i rgyal po gsal rgyal gyi sras lnga tshigs sam/ rgyal po gzugs can snying po'i sras chung ba stobs chung gi sras lnga tshigs sam/ yang na bad sa le'i rgyal po 'char byed kyi bu mig mas 'gebs pa/ sor mo dra bas 'brel ba/ mtshan dang ldan pa gcig byung ba de yin par gsungs la/ gang ltar na'ang gnya' khri btsan por mthun no/ /de yang bod kyi yig tshang las 'di ltar snang ste/ dang po lha ri gyang mtho'i rtse la byon te gzigs pas/ gangs ri yar lha sham po mtho ba dang / yul yar lung sna ba bzhi dang bcas pa bzang bar mthong nas/ lha ri rol po'i rtse la gshegs te/ lha skabs la babs nas btsan thang sgo bzhir byon pa dang / dus der bon po la sogs pa yon tan can gyi mi bcu gnyis phyugs skyong bas mthong ste/ gang nas 'ongs dris pas/ gnam la mdzub gu ker bas/ 'di ni gnam nas yong ba'i btsan po zhig 'dug pas/ rang cag rnams kyi rje zhu'o zhes g.yar 'cham nas/ gnya' bar khri la bteg ste spyan drangs pa na/ rje gnya' khri btsan po zhes bya ste/