[A:༢༥]འདི་དང་འདི་ཞེས་དང་། ལོ་བཅོ་བརྒྱད་བར་གསང་བ་ཆེན་པོས་ཆོས་འདིའི་མིང་ཙམ་སྒྲོས་མ་གཏོང་། དེ་ནས་གང་བྱེད་ཀྱང་ཁྱོད་རང་ཆོས་འདིའི་བདག་པོ་ཡིན་ཞེས་ལུང་བསྟན། ས་ཆེན་གྱིས་ཉིན་ལྟར་རྡོ་རྗེ་ཚིག་རྐང་ཚར་རེ། ཟླ་རེར་ལམ་ཡོངས་རྫོགས་བཤར་སྦྱང་ཚར་རེ་མཛད་ཀྱིན་ཡོད་པ་ལ་དུག་གི་བསྙུན་རོ་ཞིག་འཕར་བའི་རྐྱེན་གྱིས་གདམས་ངག་ཕལ་ཆེར་བསྙེལ་བ་ན་གསུང་ངག་རིན་པོ་ཆེ་སྙན་བརྒྱུད་དུ་སོང་དྲི་ས་ནི་མེད། རྒྱ་གར་དུ་ཕྱིན་ཀྱང་གདམས་ངག་འདི་ཡོང་དཀའ་སྙམ་བླ་མ་ལ་གསོལ་བ་རྩེ་གཅིག་ཏུ་འདེབས་ཀྱིན་བཞུགས་པས་རྗེ་དགོན་པ་བས་རྗེས་སུ་བཟུངས། ད་དུང་དྲག་ཏུ་གསོལ་བ་བཏབ་པས་ས་ཆེན་དགུང་ལོ་ཞེ་བདུན་ས་ཕོ་སྟག་གི་ལོར་ཉམས་དང་རྨི་ལམ་ལྟ་བུ་མ་ཡིན་པ་རྣལ་འབྱོར་གྱི་དབང་ཕྱུག་བིར་ཝ་པ་སྐུ་སྨུག་ནག་ཉི་མ་འབུམ་གྱི་གཟི་བརྗིད་ཅན་གཙོ་འཁོར་ལྔ་ཞལ་དངོས་སུ་གཟིགས། ཟླ་བ་གཅིག་གི་བར་གསུང་ངག་རིན་པོ་ཆེ་ཡོངས་རྫོགས་ལམ་སྦས་བཤད་དང་བཅས་པ་རྒྱུད་སྡེ་བདུན་བཅུ་རྩ་གཉིས་ཀྱི་