[A:༢༩]པ་བྱུང་། ཨོ་ཌི་ཡ་ན་དང་། པོ་ཏ་ལ་སོགས་སུ་ཡུད་ཙམ་གྱིས་བགྲོད་དེ་བརྟུལ་ཞུགས་ཀྱི་སྤྱོད་པ་མཛད་པས་ཉེར་གནས་ཀྱི་གཉིས་པ་བརྙེས་པ་སོགས་ཆེ་བའི་ཡོན་ཏན་མཐའ་ཀླས་ཤིང་། མཐར་ཞེ་གཅིག་པ་ཆུ་ཕོ་སྟག་གི་ལོར་ཆོས་ཁྲིའི་སྟེང་སློབ་མ་ཡེ་ཤེས་སྐྱེས་པ་བརྒྱད་ཅུའི་འཁོར་གྱི་དབུས་ན་དྲི་བཟང་རོལ་མོའི་སྒྲ་བཅས་འཇའ་ལུས་རྡོ་རྗེའི་འོད་སྐུ་མངོན་དུ་མཛད་དོ། །གང་གི་གཅུང་པོ་རྗེ་བཙུན་གྲགས་པ་རྒྱལ་མཚན་ནི། རབ་བྱུང་གསུམ་པའི་མེ་ཡོས་ལ་འཁྲུངས། རྗེ་ས་ཆེན་ཡབ་སྲས་ཀྱིས་གཙོས་བཤེས་གཉེན་གྲངས་མེད་བསྟན། འཕགས་པ་འཇམ་དཔལ་སོགས་ཀྱིས་རྗེས་སུ་བཟུང་བས་ཤིན་ཏུ་ཟབ་པ་དང་རྒྱ་ཆེ་བའི་སྡེ་སྣོད་དང་། རྒྱུད་སྡེ་རབ་འབྱམས་ལ་མཁྱེན་པའི་གཏེར་མཛོད་གྲོལ། མཁས་བཙུན་གྲུབ་པའི་གོ་འཕང་མཐོན་པོར་གཤེགས། ལྷག་པར་ཟབ་དོན་གྱི་གནད་ལ་སྒྲོ་འདོགས་ལེགས་པར་བཅད་དེ་འཁོར་མོ་ཡུག་གི་རྣལ་འབྱོར་ལ་རྩེ་གཅིག་ཏུ་གཞོལ་བས་ཕྱོགས་རེའི་ཉམས་རྟགས་ཙམ་མིན་པར་ནང་དུ་སྤང་རྟོགས་