[A:༤༧]མཚན་ཉིད་ས་ལུགས་དང་། སྔགས་བུ་ལུགས་གཙོ་བོར་མཛད་པ་འཇམ་མགོན་བླ་མ་རང་ཉིད་ཀྱི་རྣམ་ཐར་ལས་བྱུང་བ་སོགས་གངས་ལྗོངས་སུ་བྱོན་པའི་མཁས་གྲུབ་ཕལ་མོ་ཆེ་དངོས་དང་བརྒྱུད་པའི་སྒོ་ནས་ས་སྐྱ་པའི་སློབ་རྒྱུན་དུ་མ་གཏོགས་པ་མེད་པ་གཟུར་གནས་སྤྱོད་ལྡན་ཡོངས་ཀྱི་སྤྱོད་ཡུལ་དུ་གྱུར། གཞུང་བཤད་པོད་ཆེན་ལྔའི་བཤད་སྲོལ་ལ་སྔར་ས་དགེའི་མཚན་ཉིད་པ་རྣམས་ཀྱི་གསུང་རྒྱུན་དུ། ཕར་ཕྱིན་གཡག་ལ་ཐུག དབུ་མ་རེད་ལ་ཐུག ཚད་མ་ཉ་ལ་ཐུག འདུལ་བ་བྱ་ལ་ཐུག མཛོད་བྲང་ཏིའམ་མཆིམས་ལ་ཐུག་ཅེས་གྲགས་པའི་དགེ་བའི་བཤེས་གཉེན་ཆེན་པོ་དེ་དག་ཕལ་ཆེར་ས་སྐྱའི་ཆོས་བརྒྱུད་འཛིན་པ་ཤ་སྟག་ཡིན་པས། དེ་དག་གིས་རྒྱལ་བསྟན་དར་རྒྱས་སུ་སྤེལ་བའི་དྲིན་ལས་དེང་སང་གི་བར་རིས་སུ་མ་ཆད་པའི་ཆོས་གྲྭ་རྣམས་སུ་གཞུང་ལུགས་མཐའ་དག་ལ་འཆད་རྩོད་རྩོམ་གསུམ་ཁྱབ་བརྡལ་རྒྱ་ཆེ་བྱུང་བ་ཡིན་ཞིང་། ལྷག་པར་ས་སྐྱའི་མཁས་པ་གངས་ཅན་མཛེས་པའི་རྒྱན་དྲུག་ཏུ་གྲགས་