[A:༦༧]རྒྱས་ཆེ། ཁྱད་པར་སྙིགས་དུས་ཀྱི་ཐུབ་དབང་གཉིས་པ་ཀུན་གཟིགས་མཁྱེན་བརྩེ་དབང་པོས་སྒྲུབ་ཐབས་ཀུན་བཏུས་ཀྱི་བཀའ་བསྡུ་མཛད་པ་སོགས་རིས་མེད་ཀྱི་གྲུབ་མཐའ་སྤྱི་དང་། ཁྱད་པར་ས་ངོར་ཚར་གསུམ་གྱི་བསྟན་པ་མཐའ་ཁྱབ་ཏུ་སྤེལ། མགོན་དེའི་ཐུགས་སྲས་གསང་བདག་བློ་གཏེར་དབང་པོས་རྟ་ནག་མཁན་ཆེན་མི་ཕམ་སེངྒེ་རབ་རྒྱས་དང་། ངོར་དཔོན་སློབ་ངག་དབང་ལེགས་གྲུབ་ལས་ཚད་མ་དབུ་ཕར་འདུལ་མཛོད་སྡོམ་གསུམ་སོགས་གོང་མའི་བཞེད་རྒྱུན་མ་ཉམས་པ་གསན་ཏེ་པོད་ཆེན་ལྔར་འགྲེལ་པ་གསར་བསྒྲིགས་མཛད་པའི་འཆད་ཉན་ཡང་དར་རྒྱས་སུ་ཡོད། ཁྱད་པར་རྗེ་འདིས་གསང་ཆེན་བཀའི་བསྡུ་བ་ཆེན་པོ་མཛད་དེ་གངས་ལྗོངས་སུ་འགྱུར་བའི་སྒྲུབ་བརྒྱུད་ཤིང་རྟ་བརྒྱད་ཀྱི་རྒྱུད་སྡེ་ཡོད་དོ་ཅོག་གི་དབང་ཆེན་ཁྲིད་ལུང་མན་ངག་རྒྱུད་བཤད་བཅས་ཁུངས་ལྡན་ཉམས་མེད་ཡོད་པ་རྣམས་ཕྱོགས་བསྡུས་ཀྱིས་རྒྱུད་སྡེ་རིན་པོ་ཆེ་ཀུན་བཏུས་པོད་སོ་གཉིས་དང་། ལམ་འབྲས་སློབ་བཤད་པོད་བཅུ་བདུན་སོགས་ཕྱོགས་བསྡུས་དང་