[A:༧༠]མདོ་སྨད་ཨ་མདོ་རྔ་བའི་ནང་ཆོས་རྗེ་ཆོས་གྲགས་བཟང་པོས་ཕྱག་བཏབ་པའི་དྷཱི་ཕུ་ཆོས་རྗེར་གྲགས་པའི་མདོ་སྔགས་ཀྱི་གྲ་ཚང་ཆེན་པོ་དགེ་འདུན་སྟོང་ལོངས་པ་དང་། དེ་ལ་ཁོངས་གཏོགས་དགོན་ལག་བརྒྱ་དང་བརྒྱད་སོགས་ཡོད། མདོར་ན་སྟོད་ལ་དྭགས་རྒྱ་བལ་མངའ་རིས་ནས་སྨད་ཙི་ནའི་ཡུལ་མགོ་ཐོན་ཞེས་པའི་བར་ས་ལུགས་ཀྱི་ཆོས་སྡེ་ཆེ་ཕྲ་སྟོང་ཕྲག་འགའ་ཤས་མཆིས་པའི་མཚན་གྱི་རྣམ་གྲངས་ནི་སྨོས་ཀྱི་མི་ལང་ངོ།
བཞི་པ། ལུགས་དེ་མཆོག་ཏུ་དགེ་བའི་ཁྱད་པར་འཕགས་ཚུལ་བརྗོད་པ་སྟེ། མདོ་ལས་དགེ་སློང་དག་གམ་མཁས་རྣམས་ཀྱིས། །བསྲེགས་བཅད་བརྡར་བའི་གསེར་བཞིན་དུ། །ལེགས་པར་བརྟག་ལ་ང་ཡི་བཀའ། །བླང་བར་བྱ་ཡི་གུས་ཕྱིར་མིན། །ཞེས་པ་ལྟར་རྗེ་བཙུན་གོང་མ་དེ་རྣམས་ཀྱིས་མདོ་སྔགས་ཀྱི་ཆོས་ཚུལ་གང་དང་གང་ལ་ཡང་ཚོང་འདུས་ཀྱི་ཟོང་བཞིན་དུ་གང་བྱུང་ཐུགས་འཕྲད་མི་མཛད་པར། ཐོག་མར་གང་ལས་བརྒྱུད་