R965: chos lung pa chos grags pa'i rnam thar/{bod yig glog rdul dpe cha/}

  • Pagination (Witness B): 1b
[B:1b] na mo gu ru we/ lung rtogs yon tan chos kyi dpal 'byor can/ /bstan 'dzin gtsug rgyan grags pa'i snyan pas khyab/ /thos bsam man ngag dpal gyis mngon par phyug /yon tan rgya mtsho zab mo'i zhabs la 'dud// dpal ldan bla ma'i yon tan rgya mtsho las/ /chu thigs tsam zhig gus pas blangs nas ni/ gdul bya'i bsam pa bskang phyir 'dir bkod bya/ /dad ldan rnams kyis gus pas spyi bor longs/ /dpal ldan bla ma dam pa chos grags dpal bzang po'i rnam par thar pa la gnyis te/ rigs dang 'brel ba dka' ba spyad pa dang / ting nge 'dzin dang 'brel ba nyams su myong ba'i yon tan no/ /dang po ni/ 'khrungs pa'i yul shangs mda' e mar 'dzoms thang du/ gtsang 'gram pa'i dpon rgyud/ yab dpon dge bdun yum phyug mo dpal mtsho gnyis kyi sras su chu pho 'brug gi lo la sku 'khrungs/ mtshan grags pa rgyal mtshan du btags/ sku nas gzhon nu la'ang chos kyi bya ba ma gtogs 'jig rten gyi rnam g.yeng la thugs mi 'gro zhing / klog yig legs par mthar phyin par mdzad do/ / [A:97] gnyis pa dka' ba spyad pa'i yon tan ni/ shangs g.yas ru nyug ldang gi chos sde chen por mkhan po so ston 'jigs med grags pa dpal bzang po dang / slob dpon 'jam dbyangs kun dga' sengge la rab tu byung nas mtshan grags pa dpal bzang por btags/ zhang rgyal po dpal dang snar thang pa slob dpon skal ldan la phar phyin gsan nas mkhyen par mdzad/