[A:35]lhag pa'i bsam pa thugs su chud nas/ ral pa de la lo bcu gnyis su zhabs bzhag te/ g.yas phyogs nas glang po che'i lta stangs kyis gzigs shing nyan thos rnams la bka' stsal pa/ dge slong dag khyed rnams khye'u 'di'i skra la sdogs pa ma 'jog cig de ci'i phyir zhe na/ 'di ni lha dang bcas pa'i mchod gnas yin te/ ma 'ongs pa'i dus kyi bskal pa bzang po zhes bya ba la skye rgu rnams kyi tshe lo brgya pa'i dus su bcom ldan 'das de bzhin gshegs pa dgra bcom pa yang dag par rdzogs pa'i sangs rgyas rig pa dang zhabs su ldan pa bde bar gshegs pa 'jig rten mkhyen pa/ skyes bu 'dul ba'i kha lo sgyur ba/ lha dang mi rnams kyi ston pa shAkya thub pa zhes bya bar 'gyur ro zhes lung bstan pa dang / de dga' ches te nam mkha' la shing tA la bdun srid du mngon par 'phags nas/ ting nge 'dzin bye ba phrag khrig brgya phrag stong yang mngon du byas nas sa brgyad pa thob ste/ ji skad du/ sangs rgyas mar me mdzad la utpal lngas/ /gtor te ral pa gdan du bting byas pas/ /mi skye'i chos la bzod pa thob gyur nas/ /shAkya'i rgyal por 'gyur zhes nga lung bstan/ /zhes pa dang / 'dul ba lung las/ gang tshe mar me mdzad kyis nga / /lung bstan gyur pa de yi tshe/ /sa brgyad pa ni thob gyur cing / /dbang bcu dag kyang thob par gyur/ /zhes so/ /sa bdun man chad du dngos su lung bstan pa mi 'byung ste/ mtshan ma dang bcas pa'i phyir ro/ /byang chub sems dpa'i sde snod las/ mar me mdzad kyi pha rol na ngas dkar po'i chos la ma spyad pa gang yang med de lung ma bstan no/ /ci'i phyir zhe na/ 'di ltar mtshan ma dang bcas pas spyod par gyur to/ /zhes so/ /de nas mar me mdzad de