[A:36]bsnyen bkur ba nas bzung ste bskal pa grangs med pa gcig la brgya lus pa na/ de bzhin gshegs pa skar ma'i rgyal po zhes bya ba 'jig rten du byon pa la/ skyes bu khyu mchog khyod 'dra'i dge sbyong chen po gzhan dag lha yul sa la'ang med/ / ces tshigs su bcad pa gcig pas zhag bdun gyi bar du bstod cing bskor ba byas pa'i brtson 'grus kyis bskal pa dgu'i tshogs 'dums par gyur to/ / mdo gang po'i rtogs pa brjod pa las/ bram ze dam pa 'di ring du/ /de bzhin gshegs pa legs bstod pa'i/ /stobs dang brtson 'grus rdzogs pa 'di/ / bskal pa dgu zhig 'dums par gyur/ /zhes so/ /de nas 'jig rten gyi khams rnam par bltas pa zhes bya bar/ de bzhin gshegs pa rnam par gzigs zhes bya ba byon nas bsnyen bkur ba nas bzung ste/ bskal pa dgu bcu rtsa gcig 'das pa na/ bskal pa bzang po 'di nyid skye rgu rnams kyi tshe lo nyi khri pa la/ grong khyer gnyen ldan du sangs rgyas 'od ldan byon pa na bram ze'i khye'u bla ma zhes bya bar gyur pa des/ mnyes par byas pa'i mthar thug par grangs med pa gcig tu sangs rgyas bdun khri bdun stong la tshogs gnyis bsags pas/ sa brgyad pa mi g.yo ba dang / dgu pa legs pa'i blo gros dang / bcu pa chos kyi sprin te dag pa'i sa gsum brnyes pa'o/ /'dul ba lung las/ sangs rgyas shAkya thub pa nas/ / 'dren pa yul 'khor skyong gi bar/ /bdun khri lnga stong tshang ba yi/ /sangs rgyas rnams ni ngas mchod do/ /sangs rgyas legs mdzad nas bzung nas/ /dbang po'i rgyal mtshan thub pa'i bar/ /bdun khri drug stong tshang ba yi/ /sangs rgyas rnams ni ngas mchod do/ /sangs rgyas mar me mdzad nas ni/ /sangs rgyas 'od