[A:57]la 'jigs pa'am/ ya nga ba'am bag tsha ba med cing mtshon cha la sogs pa bsnun pas kyang / byams ldan thub pa de yi sku la ni/ /me dang dug dang mtshon gyis mi tshugs shing / /mtshon cha 'phangs pa'ang me tog nyid gyur te/ /'di ltar de yis byams chen bsgom phyir ro/ /zhes pa'i tshul gyis gnod par ma gyur la/ bdud kyi bu mo bzhin mdzes ma dag kyang rgan mor bsgyur to/ /de nas sdig can gyi bu stong las blo gros bzang po dang ngan pa la sogs pa byang chub sems dpa' dang pha'i phyogs gnyis su chad de/ pha'i phyogs gzi brjid drag shul can zhes bya bas| 'brog gi me lce chung ngu yis/ /nags tshal phun tshogs bsregs pa ltar/ / bdag ni shAkya'i lus bzangs kyi/ khong du zhugs te bsregs par bgyi/ /zhes smras pa dang / byang chub sems dpa'i phyogs kyi mig bzangs zhes pas/ khyod ni ri rab nang zhugs te/ /thams cad bsregs par nus gyur kyang / khyod 'dra ganggA'i bye snyed kyis/ /rdo rje'i thugs ldan bsregs mi nus/ /zhes brtsad pas ma thub cing / yang byang chub sems dpas sdig can khyod kyis ni gtan pa med pa'i mchod sbyin gcig gis 'dod pa'i dbang phyug gzhan 'phrul dbang byed thob par zad la/ ngas ni mchod sbyin bye ba phrag khrig brgya stong du mas byang chub brnyes so// zhes gsungs pa dang / sdig can gyis/ sngon chad kho bos mchod sbyin gtan pa med| |byas pa la ni khyod nyid dpang yin na/ khyod la 'di na dpang 'ga' yod min pas/ /smras kyang dpang med 'di ni pham pa yin/ /zhes rgyu lam bsgrub pa la skur ba btab pa dang / byang chub sems dpas phyag g.yas pa sa la brdabs te|sa 'di 'gro ba kun gyi gnas yin te/ /rgyu dang mi rgyu nye ring med par snyoms//