[A:58] 'di ni bdag gi dpang ste rdzun med pas/ /sa khyod 'di la bdag gi dpang gyis shig |ces gsungs pas sa rab tu g.yos pa dang / sa'i lha mo brtan ma gser gyi mdog can lus phyed phyung ste/ skyes bu chen po de bzhin te/ don 'di bdag la mngon sum yin mod kyi 'on kyang bcom ldan 'das nyid dpang dang tshad mar gyur pa lags so/ /zhes pa dang / sdig can dpung bcas sgra de thos pa nas// nags su seng ge'i sgra bsgrags wa tshogs dang / /bya rog rdo 'phangs mod la byer ba bzhin/ /dngangs skrag snying gas tsam du thams cad bros/ /zhes pas spobs pa med nas mi snang bar gyur te/ dga' rab dbang phyug mya ngan gyi khang bur zhugs so/ /de nas skabs der gtsang ma'i ris kyi lha rnams kyis sdig can la/ khyod ni khrung khrung rgan mo ltar sems dma' ba'o/ /bya rog ltar mu cor smra ba'o// seng ge la wa ltar bros so/ /sngags kyis sbrul ltar tshar chod pa'o/ /zhes pa la sogs pa spyo ba bcu drug gis smad cing / byang chub kyi shing gi lha mo dpal ldan dang | sgeg ma la sogs pa brgyad kyis byang chub sems dpa' la/ khyod ni zla ba nya ltar mdzes pa'o/ /nyi ma ltar lhang nge'o/ /padma ltar rgyas pa'o/ /zhes pa la sogs pa bcu drug gis bstod pa yang byas so// //
! bcu pa sangs rgyas pa ni/ de nas dgun zla tha chung gi gnam stong gi nam gyi cha stod la bsam gtan bzhi mngon du mdzad cing gung thun la mngon par shes pa lnga bskyed nas/ tho rangs zag pa zad pa mngon sum du mdzad de/ sa bcu rgyun gyi tha ma rdo rje lta bu'i ting nge 'dzin skad cig dang ldan pa'i shes rab kyis/ mtshams sbyor ba'i nyon mongs pa sa bon dang bcas pa rtsa ba nas spangs te/ phung