[A:82]'khor lo mu stegs pas ma zlog gam zhes pa la/ gang pos/ blo ldan bstan pa gnas bya'i phyir/ /nyan thos dge 'dun tshogs nas ni/ /de dag der ni 'dus gyur te/ khyod la 'dod cing don brtson byed/ /gru chen rgyal po de zhig ste/ /ye shes ri yang rnam par nyil/ /bstan pa rab mchog ldan pa yi/ /dge slong mang po rnams kyang zhi/ /gyi na ma lags nges par ni/ /bdag ni pho nyar 'dir 'ongs na// bstan pa gnas par bya ba'i phyir/ /de bas khyod ni myur du bzhud/ /ces pa dang / ba glang bdag gis/ 'gro ba'i sgron me mgon po bzhugs na der/ / bdag ni 'gro bar bya ba'i blo yod kyang / /de ni rab zhi pha rol gshegs gyur na/ / blo ldan gang zhig 'jig rten de dag 'gro/ /chos gos lhung bzed rnam gsum mchog 'di dag khyod kyis dge 'dun rnams la dbul bar gyis/ /bdag ni zhi ba yang srid med par 'gro/ /bdag gi nyes pa 'phags pas bzod par gsol// zhes te lus ye shes kyi mes bsregs te 'das pa dang / me de bsil bar byed pa'i chu bo'i rgyun bzhi las chos kyi sdom bzhi 'dzin pa'i tshigs su bcad pa bzhi byung ste/ da ltar dus rnams ngan gyur te/ /sems can so so'i las la brten/ / 'gro ba kun 'jug mkhyen pa yi/ /skye bo'i sgron ma rab tu nub/ /'dus byas phung po skad cig 'jig 'gyur te/ /skye la sogs pa'i sdug bsngal nyon mongs ldan/ / so so'i skye bo bdag tu nyon mongs te/ /su yis kyang ni byas pa med pa'o/ / mkhas pas rtag tu bag yod pa ru byed/ /yid kyis bsod nams dag ni rab tu bya/ /'byung po rnams kyis bsags pa'i mtha' 'jig cing / /srog dang bcas pa'i dpal ni g.yos par 'gyur/ /thub pa de la blo mchog yang dag 'dud/ /