[A:103]par sla bas brtson 'grus bya mi dgos so snyam na/ ma yin te gsang ba bsam gyis mi khyab pa'i mdo las/ 'jig rten sangs rgyas 'byung ba brgya lam ste/ /mi yi lus ni tshegs kyis rnyed par 'gyur/ /kye ma dad pa dang ni chos nyan pa/ /'di 'dra bskal pa brgyar yang rnyed par dka'/ /zhes pa dang / spyod 'jug las/ dal 'byor 'di ni shin tu rnyed par dka'/ /zhes pas/ dal 'byor rnyed par dka' ba yin te/ yul mtha' 'khob dang / dus chos nub pa dang / gang zag dmyal ba la sogs pa thams cad la chos med pa'i phyir ro// gal te go lo byas nas chog go snyam na/ ma yin te/ bshes spring las/ tshe 'di gnod mang rlung gis btab pa yi/ /chu yi chu bur bas kyang mi rtag na/ /zhes pas thob pa'i dal ba yun ring du mi gnas pa yin te/ tshe thung ba dang dus mi sdod pa dang / rtsod pa la sogs pa'i bar chad mang ba'i phyir ro/ /de ltar na'ang tshe gzhan du bsgrub pas chog go snyam na/ ma yin te spyod 'jug las/ gang tshe dge spyad skal ldan yang // bdag gis dge ba ma spyad na/ /ngan 'gro rmongs shing sdug bsngal ba/ /de tshe bdag gis ci byar yod/ /ces pas tshe gzhan du sgrub pa'i skabs med pa yin te/ ngan song gsum du skyes na dad pa'i nyid dang rtogs pa dang bsgrub pa'i rten du mi rung ba'i phyir ro/ /de lta bas na shes ldan dag gis 'di 'dra'i dal ba thob pa chud mi gzon par pang du sbrul zhugs pa'am mgo la me shor ba lta bu'i brtson 'grus kyis mnyan par gyis shig 'gyod pa can du 'gyur ta re/ zhes brjod par bya'o|| ||
! gnyi pa thos pa don ma yin par 'gyur ba la/ bsam sbyor 'bras bu