[A:104]don ma yin par 'gyur ba gsum las/ bsam pa ni khe dang grags pa dang pha rol gzhom pa'i bsam pa ngan pas nyan pa ste/ bsam pa des chos nyan pa'i sbyor ba thams cad nyes spyod du 'gyur ba'o/ /sbyor ba ni chos dang chos smra ba la log par bsgrub pa ste/ sems kyis ma mos pa ma dad pa dang / lus kyis mngon du phyag mi 'tshal/ spyod lam mi sdom pa dang / de dag gis rnam par smin pas ngan song du lhung ba dang / myong ba rgyu mthun tshe rabs thams cad du chos dang chos smra ba dang mi 'phrad pa dang / mthong chos tshe 'di nyid kyi bde ba las nyams par 'gyur ba ste/ yum rgyas pa las/ shA ri'i bus bcom ldan 'das la chos spangs pa'i rnam par smin par ji tsam du 'gyur zhes zhus pas/ de'i lus kyi tshad ma gleng zhig ces gsungs nas ma gnang ba dang / yang zhus pas/ phyogs bcu'i 'jig rten re rer bskal pa dpag tu med par dmyal bar 'tshed pa dang / de nas phyogs bcu'i yi dwags dang dud 'gror skye zhing tha na mir skyes na yang 'on pa dang lkugs pa la sogs par 'gyur ro/ /zhes pa dang / rgyud bla ma las/ gang zhig yang yang sdig grogs bsten pas sangs rgyas ngan sems ldan gyur dang / / pha ma dgra bcom gsod pa bya ba min byed mchog tshogs 'byed pa'i mi/ /de yang chos nyid nges par bsam pas myur du de las thar 'gyur gyi/ /gang zhig yid ni chos la sdang ba de la thar pa ga la yod/ /ces so/ /'bras bu las don ma yin pa ni nyan pa'i yon tan gyis sems khengs shing sgrub pa mi byed par snyan pa dang rnyed pa 'tshol ba'o/ /gsum pa mnyan pa don med pa ni blo'i mthu nyid med pa'am yod kyang bying ba'i rnam par g.yeng bas dang po thos pa'i don mi shes pa