[A:336]བསྟན་པའི་སྲོལ་བཏོད། འཇམ་དཔལ་རྡོ་རྗེའི་སྤྲུལ་པ་རྗེ་ཁྲི་སྲོང་ལྡེ་བཙན་གྱི་སྐུ་རིང་ལ་མཁན་སློབ་གཉིས་དང་བཻ་རོ་ཙ་ན་སོགས་ལོ་པཎ་མང་པོ་དབུའི་བླ་མཆོད་དུ་བཀུར་ཏེ་ཐེག་པ་ཆེ་ཆུང་གི་བཀའ་དགོངས་འགྲེལ་མཐའ་ཀླས་པ་བསྒྱུར་ནས་བསྟན་པ་དར་རྒྱས་སུ་མཛད། སད་ན་ལེགས་འཇིང་ཡོན་གྱི་དུས་བནྡེ་དཔལ་བརྩེགས། ཆོས་ཀྱི་སྙིང་པོ། དེ་ཝནྡྷེ་དཔལ་གྱི་ལྷུན་པོ་སོགས་ཀྱིས་ཕང་ཐང་ཀ་མེད་ཀྱི་གཙུག་ལག་ཁང་ན་བཞུགས་པའི་གསུང་རབ་རྣམས་ལ་ཤླཽ་ཀ་གྲངས་ཐེམ་བྱང་བཀོད་པར་དཀར་ཆག་ཕང་ཐང་མ་ཞེས་བཀའ་འགྱུར་ཕྱོགས་གཅིག་ཏུ་བསྒྲིགས་པའི་ཐོག་མ་ཡིན་ཞིང༌། དེ་རྗེས་བན་དེ་དཔལ་བརྩེགས་དང་འཁོན་ཀླུའི་དབང་པོ་སྲུངས་སོགས་ཀྱིས་སྟོང་ཐང་ལྡན་དཀར་ན་བཞུགས་པའི་གསུང་རབ་རྣམས་བསྒྲིགས་ནས་དཀར་ཆག་ལྡན་དཀར་མ་མཛད། སྔོན་ལྷ་སྲས་ཡབ་མེས་ཀྱི་རིང་ལ་ལོ་པཎ་རྣམས་ཀྱིས་ཆོས་སྐད་བོད་ལ་མ་གྲགས་པ་ལས་མིང་དུ་བཏགས་པ་མང་དག་ཅིག་མཆིས་པའི་ནང་ནས་འགའ་ཞིག་ཆོས་ཀྱི་གཞུང་དང་བྱཱ་ཀ་ར་ཎའི་ལུགས་དང་མི་མཐུན་པ་རྣམས་བཙན་པོ་ཁྲི་ལྡེ་སྲོང་བཙན། འོན་ལྗང་རྡོ་ན་བཞུགས་པའི་དུས་ཉི་འོག་གི་མཁན་པོ་ཨཱ་ཙརྱ་ཛི་ན་མི་ཏྲ། སུ་རེནྡྲ་བོ་དྷི། ཤཱི་ལེནྡྲ་བོ་དྷི། དཱ་ན་ཤཱི་ལ༑ བོ་དྷི་མི་ཏྲ་དང༌། བོད་ཀྱི་མཁན་པོ་རཏྣ་རཀྵི་ཏ། དྷརྨ་ཏཱ་ཤཱི་ལ། ལོ་ཙཱ་བ་ཛྙཱ་ན་སེ་ན་ཛ་ཡ་རཀྵི་ཏ། མཉྫུ་ཤྲཱི་ཝརྨ། ན་ལེནྡ་རཏྣེནྡྲ་ཤཾ་ལ་སོགས་ལོ་པཎ་རྣམས་ལ་རྒྱལ་པོས་དཔྱད་པ་གྱིས་ཤིག་པར་བཀའ་གནང་སྟེ་འགྱུར་རྙིང་མི་བཅོས་སུ་མི་རུང་བ་རྣམས་ཀྱང་བཅོས་སྐད་ཀྱི་མིང་གཅེས་སོ་འཚལ་གྱིས་ཀྱང་བསྣན་ནས་ཐེག་པ་ཆེ་ཆུང་གི་གཞུང་ལས་ཇི་ལྟར་འབྱུང་བ་དང་གཞན་པའི་མཁན་པོ་ཆེན་པོ་ནཱ་གཱརྫུ་ན་དང་བ་སུ་བནྡྷུ་སོགས་ཀྱིས་ཇི་ལྟར་བཤད་པ་དང་བྱཱ་ཀ་ར་ཎའི་ལུགས་དང་ཡང་བསྟུན་ཏེ་འཇལ་དཀའ་བ་རྣམས་ཀྱང་ཚིག་སོ་སོར་ཕྲལ་ནས་གཏན་ཚིགས་ཀྱིས་བཤད་དེ་གཞུང་དུ་བྲིས། སྐད་རྐྱང་པ་བཤད་