[A:306]yum gyi lhums su zhugs shing/ me mo lug gi lo la ngo mtshar ba'i dge mtshan du ma dang bcas te 'khrungs pas kun ngo mtshar bar gyur nas mched gsum yod kyang bla mar 'os pa ni/ bar pa 'di'o zhes zer zhing/ yab kyi chos lugs la mkhas par len du bcug ste/ mtshan shes rab 'od zer zhes bya bar btags so//
sngon nas bla ma chen po'i rigs rgyud yin pas/ yul ljongs de'i skye bo kun gyis phyag byed cing bla mar 'khur la/ lugs de la brten pa'i 'chad rtsod rtsom gsum gyi bya ba yang mang du mdzad do//
1.2.2
sangs rgyas kyi bstan pa la ji ltar zhugs pa'i tshul/
gnyis pa ni/ de nas dgung lo bcwa brgyad bzhes pa'i tshe/ 'khor ba mtha' dag dug gi rgya mtsho chen po lta bur gzigs te/ mtha' yas pa'i sems can gyi don du thams cad mkhyen pa'i go 'phang la dmigs pa'i thugs khyad par 'khrungs nas/ dpal gsang phu ne'u thog gi chos grwa chen por phyag phebs so//
de'i tshe gling stod kyi gdan sa ba sems dpa' chen po rin chen rnam rgyal gyi drung du/ byang sa nas gsungs pa'i cho gas byang chub sems dpa'i tshul khrims yang dag par bzung zhing/ mkhas pa'i dbang po rkong ston blo gros dbang phyug gi drung du/ mngon par rtogs pa'i rgyan 'grel pa dang bcas pa dang/ tshad ma rnam par nges pa dang/ rigs pa'i thigs pa sogs gsung rab mang du gsan cing/ shin tu mkhas par gyur nas/ dgung lo nyi shu rtsa gnyis pa'i tshe tshad ma rnam par nges pa'i TI ka mdzad cing/ dus de nyid nas bzung slob ma shes rab can mang po la bshad nyan gyi dbu gtsugs te/ slob dpon rong ston zhes snyan pa'i grags pas sa'i steng ma lus par khyab par mdzad pa yin no//
de'i tshe 'phan yul mthong smon gyi gtsug lag khang du/ dpal gro sa'i mkhan po chen po mkhas btsun kun dga' rgyal pos rab tu byung ba dang