[A:467]yod pa rnams sun 'byin pa'i bstan bcos/ sdom pa gsum gyi rab tu dbye ba dang/ sangs rgyas la zhu 'phrin dang/ mkhas pa 'jug pa'i sgo la sogs pa mdzad/ de la brten nas thos bsam sgom gsum mthar phyin pa dang/ 'chad rtsod rtsom gsum la mkhas pa dang/ mkhas btsun bzang gsum gyi snyan pas 'dzam bu gling thams cad khyab par gyur pa dang/ sku tshe 'di dang phyi ma'i lung bstan pa rnal 'byor dbang phyug dang rje btsun sogs las brnyes pas chos kyi rje zhes bya ba'i mtshan yang sngon bod du ma grags pa 'di pas thob pa'o//
de ltar bdag nyid chen po 'dis dge 'dun gyi sde dang klog pa pa'i grwa chen po tshugs/ chos rnam par dbye ba'i bstan bcos kyi tshogs kyang grub/ rig pa'i gnas lnga yang sngon ma grags pa dag 'gyur/ rdo rje theg pa'i phyag len dang nyams len sgo du ma nas ma tshang ba med par bzhugs pa de'i tshe/ rje gong ma gsum gyi dgongs pa zab mo yongs su rdzogs pa'i dga' ston la dgongs nas/ phyogs bcu'i dge 'dun lhag pa'i tshul khrims kyi bslab pa la gnas pa dang/ sde snod dang rgyud sde'i tshig don la mkhas pa dang/ gzhung sna re tsam bzung pa yan chad 'du ba rgya chen po spyan drangs/ zhag grangs du ma'i bar du bsnyen bkur pa dang/ bkur bsti dang rnyed pa'i tshogs kyis mnyes shing tshim par byas/ chos kyi rnam grangs mang po sgo du ma nas gleng slang ba dang/ bka' bgro ba dang rgal zhing brtag pa'i rim pas thams cad mgu zhing yid rang bar mdzad/ rje nyid kyis 'dus pa rgya mtsho'i dbus su so sor thar pa'i mdo dang/ dus bzang po'i mdo gtsang zhing dag par 'don pa bton pas 'thun pa dang bkra shis pa'i gso sbyong mdzad/