[A:466]gnas lnga shes pa gzhan med pas/ khong la paNDi ta'i mtshan kun gyis 'thun par btegs/ spyir chos mang rab kyi gsar 'gyur dang 'gyur bcos mdzad/ khyad par sgra dang snyan ngags dang sdeb sbyor dang/ ming gi mngon brjod dang/ zlos gar dang/ gso ba dang bzo dang/ sku gzugs kyi phyag tshad la sogs pa'i bstan bcos kyi lus yongs su rdzogs pa ma 'gyur yang/ rgya dpe'i stengs su bslab sbyangs mthar phyin par mdzad nas/ gal che ba'i thad ka rnams la 'gyur dang/ de gsal bar ston pa'i bstan bcos du ma mdzad/ skabs der kun gyis lo tsA ba'i mtshan gsol/ de dag gi skabs shig tu tshangs pa dang khyab 'jug gi rjes su 'jug pa'i mu stegs kyi ston pa dag gis/ kha ba can gyi sa skya pa'i chos smra ba dag dang rtsod pa'i dus btab/ lung rigs smra ba kha cig gi grogs dang bcas/ mang yul skyid pa'i grong khyer du chas te byon/ bstan pa dpang du btsugs te samaskRa ta'i skad kyis de dang brtsad pa na/ dus der rgya gar na rtsod pa'i khyu mchog gzhan las khyad par du 'phags par grags pa 'phrog byed dga' bo slob ma'i tshogs dang bcas pa sangs rgyas kyi bstan pa la btsud nas 'khor du khrid nas phebs so//
de nas bod kyi bshad srol gzhan la rag ma las pa'i so sor thar pa dang/ rtog ge dang/ mngon pa dang mdo sde dang rig pa'i gnas lnga la sogs pa bshad pa'i grwa chen po 'dzugs par bzhed nas/ bod la grags pa'i rtog ge sun 'byin pa tshad ma rigs pa'i gter dang/ gsang sngags rnying ma dang/ bka' gdams pa dang/ phyag rgya ba spyi dang khyad par ba bdag?dag dang/ rgya gar nas gsar du 'gyur pa'i chos lugs 'ga' zhig ste/ de dag rnams la ril po 'gog par mi mdzad kyang/ nor pa'i 'phrang