[A:461]nyid kyis rab tu gnas par mdzad pa de spyan drangs/ de'i byin rlabs kyi mthu las chos rgyal khri srong sde'u btsan gyis byang chub sems dpa' zhi ba mtsho dang/ sprul pa'i sku padma 'byung gnas spyan drangs/ bai ro tsa na dang/ ka cog zhang gsum la sogs pa sprul pa'i lo tsA rang gi ngang gis byon/ sde snod gsum dgongs 'grel dang bcas pa gsang sngags phyi nang gi chos mang du bsgyur/ autanta pu ri'i bzhengs tshul dang/ thos bsam sgom gsum gyi grwa chen po ji ltar yod pa'i tshul dper blangs nas/ dbus su rdo rje dbyings kyi gzhal yas khangs chen po ri rab dang mtshungs pa/ mtha' bskor du gling bzhi gling phran brgyad dang mtshungs pa'i gtsug lag khang so sor/ sdom pa 'bogs len gyi grwa dang/ 'dul ba'i khrims kyis brtul zhugs la yang dag par gnas pa'i grwa dang/ chos bsgyur ba dang/ 'chad pa'i grwa dang/ gsang sngags kyi dbang dang nyams su len pa'i sgom sgrub kyi grwa so sor btsugs nas bstan pa'i sgo ma lus pa mtha' dag nyi ma shar ba lta bur mdzad do//
de'i 'og tu mnga' bdag khri ral pa can gyis yab mes kyis bsgyur ba'i chos ji snyed pa skad gsar bcad kyis gtan la 'bebs pa/ mnga' ris kyi rab byung ji snyed pa bsdus nas zhabs spyi bor len pa/ chos kyi sgo du ma nas bgro ba dang gleng ba dang/ rab tu byung ba re re la 'bangs mi khyim bdun bdun 'bul ba/ yab mes kyi lha khang las bkod pa khyad par du 'phags pa'i gtsug lag khang bzhengs pa rnams dus cig char du mdzad par grags pa dang/ de ltar na chos rgyal mes dbon rnam pa gsum gyis ston pa'i sku dang/ bstan pa'i gzhi 'dzugs pa/ bar du rab tu byung ba dang bstan pa ma lus pa'i sgo dar zhing rgyas par mdzad/ tha mar bstan pa