[A:178]pa'i dga' bskyed gtam//
bcings pa grol ltar don mtshon pa'i//
mchog tu skal bzang bsti gnas nyid//
'di na kun rtog me long la//
rang dga'i bag chags gzugs brnyan tsam//
'dzin pa rang grol shar ba'i tshe//
mchog dman yongs la gsal bar smras//
cung zad bzlos par smos pa rnams//
blo gros dman pas go phyir te//
shin tu blun ngor brjod pa na//
smra po ba lang mtshon pa nyid//
de skad brjod 'di snyoms las kyi//
'dam byings gyur kyang dbang med du//
bskul byed mang po'i nan tshig ngor//
sdebs la mkhas rnams bzod par bzhes//
'dir 'bad las byung dge ba'i cha//
kun dga'i yid ches las skyes pas//
'gro ba smin grol lam 'god pa'i//
ded dpon mchog tu bdag gyur cig//
ces pa 'di ni bod yul stod kyi cha// mnga' ris kyi rgyud du byung ba'i dge slong thos pa 'dzin pa dpal ldan kun dga' grol mchog blo gsal rgya mtsho'i sde ces bya bas// bstan pa la dga' ba'i lha rnams kyis mngon par bsrungs pas phyir rgol gzhan gyis klags blta bar dka' ba'i ljongs/ mi 'jigs pa skyabs kyis sbyin pas bde bar tsho ba'i zhing/ zong 'dod dgu 'byung ba'i tshong 'dus/ dpal khri gang gi yang rtse rnam par rgyal ba'i khang bzang mthon por sbyar ba las/ slar yang bsod nams chen po'i dpal gyis mngon par mtho ba'i mi dbang yab sras kyi bkas/ lhag ma lus pa'i gnas 'doms pa zhig ci nas kyang spel zhing nyer len gyi legs tshogs mtha' dag yang yang du bskul 'debs nan gyis mdzad de yongs su rdzogs par/ dpal snar thang gi chos grwa chen po/ nag pa zla ba'i tshes gcig la grub pa'i yi ge pa ni/ shra dhaM pradznya ma ti dzo ki tsarya se na ces bya bas mos shing gus pa'i blos bgyis pa phyogs dus thams cad du dge legs kyi rgyur gyur cig// //
rnam thar skal bzang dad pa'i shing rta 'dren byed kyi 'phros zur 'debs mdzes rgyan/