[A:207]nas/ yang yang du yid bde lhag par bskrun pa'i bsti gnas mi 'jigs pa skyabs kyis 'tsho ba'i pho brang 'di nyid du/ rgyun gyi rgyal ba 'od snang gi tshe chog brgya rtsa dang 'brel bar/ rang myong gi bcud/ nyams len gyi mthil/ rtogs chos kyi ngo bo/ zab mo ni gu'i chos drug gi phyag khrid/ mgon dkar yid bzhin nor bus mtha' bsten pa'i legs lam spel ba'i skabs 'di nyid do ces/
re shig brjod pa'i sgor gyur pa yang de tsam de//
dbri bsnan med pa'i sargar phye ba yang li khi taM//
shes bya'i pha mtha' rjes dpog bya lam 'dra//
rnam dpyod gshog pas bgrod tshe dka' ba ci//
'di na sna tshogs grub mtha'i 'ja' ris la//
bden par rtogs pa'i log shes byis pa'i blo//
kye ho mig gyu'i chu la skom pa'i bcud//
gdung sems re ba'i 'grogs 'gro'i re dgas dag//
rkang bang dgos med ngal ba 'di ko zhes//
las snang sgyu ma'i mig 'phrul e ma mtshar//
thos pa'i bdud rtsi bsil mngar ldan pa'i ro//
bsam byung lce yis myang tshe de lta'i tshul//
bsgom pa yang dag don las gzhan min ces//
snying gi rtag la lan brgyar 'char bar byos//
chos tshul gang la'ang sdang zhen ma mchis par//
ci ste shAkya'i bka' nyid tshad mar gzung//
rgyud sde'i nges gsang grub pa'i zhal lung la//
dges dgur spyod la yi rang spel bar gyis//
tshig 'bru yid kyi glegs bur bris pa'i tshe//
yig nag dpe tshogs khal rdo'i ngo bor go//
don bzhin nang lta'i bsam gtan la dpyad pas//
tshig gi sbu ba srang mtha'i rtsa bzhin shes//
bstan pa'i rtsa lag dam chos bdud rtsi'i sgo//
rnam grangs bye bas yid dbang