[A:218]མོ་སུམ་བརྒྱའི་དཀྱིལ་ནས། སུས་ངོ་ཤེས་པ་ལ་སྟེར་བར་ཐག་ཆོད་འདུག་པས། སྤྱང་གླེན་མ་ནོར་བ་ཞིག་བྱེད་དགོས་ཟེར་རོ། །དེ་ནས་ཞག་གསུམ་གྱི་ཉིན་པར་བུ་མོ་རྒྱན་གྱིས་བརྒྱན་པ་སུམ་བརྒྱ་ཤར་སྒོའི་ཐང་ལ་བསྒྲིགས་སོ། །རྒྱ་ནག་གི་མི་ཐམས་ཅད་ལྟད་མོ་ལ་འཚོགས། དེར་རྒྱལ་པོའི་ཞལ་ནས། བློན་པོ་རྣམས་སྔར་གྱི་གོ་རིམ་བཞིན་བདོམས་ཤིག་གསུང་ངོ༌། །དེར་རྒྱ་གར་ཆོས་ཀྱི་རྒྱལ་པོའི་བློན་པོ་རྣམས་བྱུང་སྟེ། གྲལ་གྱི་དཀྱིལ་ནས་བུ་མོ་ཆས་བཟང་ཞིང་མཛེས་པ་གཉིས་ཁྲིད་ནས་གཅིག་མིན་ཀྱང་གཅིག་ཡིན་ཏེ་འོང་ཟེར་ནས། འུ་སྒྲ་དང་བསོ་སྒྲ་འདེབས་ཀྱིན་སོང་ངོ༌། །དེའི་རྗེས་ལ་སྟག་གཟིག་ནོར་གྱི་རྒྱལ་པོའི་བློན་པོ་རྣམས་བྱུང་སྟེ། བུ་མོ་མཛེས་མ་གཉིས་ཁྲིད་ནས་སྔར་ལྟར་བྱས་ནས་སོང་ངོ༌། །དེའི་རྗེས་ལ་གེ་སར་དམག་གི་རྒྱལ་པོའི་བློན་པོ་རྣམས་བྱུང་སྟེ། བུ་མོ་མཛེས་མ་གཉིས་ཁྲིད་ནས། སྔ་མ་ལྟར་བྱས་ནས་སོང་ངོ༌། །དེའི་རྗེས་ལ་བྷ་ཏ་ཧོར་གྱི་རྒྱལ་པོའི་བློན་པོ་རྣམས་བྱུང་སྟེ། བུ་མོ་མཛེས་མ་གཉིས་ཁྲིད་ནས་སྔ་མ་ལྟར་བྱས་ནས་སོང་ངོ༌། །དེར་བློན་པོ་མགར་གྱིས་བལྟས་པས། དེ་རྣམས་ཐམས་ཅད་མིན་པར་ཤེས་ཏེ། རབ་ཏུ་དགའ་ནས་འཛུམ་མུལ་གྱིས་ཤོར་རོ། །དེར་མགར་གྱིས་མདའ་དེ་ལག་ཏུ་ཁྱེར། བོད་བློན་རྣམས་ཁྲིད་དེ། གཡོན་གྲལ་དུ་གཏད་ཕྱིན་ནས། གྲལ་གྱི་མཐའ་མའི་བུ་མོ་དེ་ལ། མགར་ན་རེ། འདི་ནི་བཤན་པའི་བུ་མོ་འདྲ། །ལག་པ་འདི་ཡི་དམར་ལུགས་སམ། །དེ་ཡི་གོང་ན་འདུག་པ་དེ། །རྫ་མཁན་ཞིག་གི་བུ་མོ་འདྲ། །ལག་པའི་སེར་ཁ་མང་ལུགས་སམ། །དེ་ཡི་གོང་ན་འདུག་པ་དེ། །ཤིང་མཁན་ཞིག་གི་བུ་མོ་འདྲ། །གོས་ལོག་འདི་ཡི་སྐྱ་ལུགས་སམ། །དེ་ཡི་གོང་ན་འདུག་པ་དེ། ཁྲབ་མཁན་ཞིག་གི་བུ་མོ་འདྲ། །སྟེང་གོས་འདི་ཡི་སྣུམ་ལུགས་སམ། །དེ་ཡི་གོང་ན་