[A:231]འདི་སྐད་ཟེར་ཏེ། ཁོ་ལ་བསུ་བའི་རྟ་པ་མང་ལ་རྩལ་ཆེ་བ་བྱུང་འདུག ངེད་རང་རྣམས་ཀྱིས་མི་ཐུབ། ལོག་པ་འཐད་ཟེར་ཏེ། དེ་ནས་ལོག་གོ །དེའི་བར་ལ་རྒྱ་མོ་བཟའ་ལ་སོགས་པའི་བོད་བློན་རྣམས་ཀྱིས་ལྡན་མ་བྲག་རྩར་ཕེབས་ནས། བྲག་ལ་བྱམས་པ་ཁྲུ་བདུན་པ་ཞིག་དང༌། བཟང་སྤྱོད་གཉིས་བརྐོས་མར་བཞེངས། དེར་ཟླ་བ་གཅིག་བསྒུག་དེར་ཡང་བློན་པོ་མ་བྱོན། ཕུང་པོ་རི་ལ་ཕྱག་ཕེབས། ལ་ལ་འཕྲེད་ལམ་བཅོས། རི་དྭགས་བཟུང་ནས་འོ་མ་བཞོས། དེར་ཡང་བློན་པོ་མ་བྱོན། ཁམས་ཀྱི་པདྨ་ཤང་དུ་ཆག་ཕེབས། ཞིང་བཏབ། རང་ཐག་ཆུ་བསྐོར་བཙུགདེར་ཟླ་བ་གཉིས་བསྒུག དེར་ཡང་བློན་པོ་མ་བྱོན། དེ་ནས་སྒོ་དོང་སྒོ་མོའི་རྩར་ཕེབས། རྒྱ་ནག་གི་ཕྱྭ་གཡང་ཉམས་པས། རྒྱ་ནག་གི་ལྷ་སྲུང་རྣམས་ཀྱི་མཐུས་སྒོ་མོ་འགགས་པས་དེར་ཟླ་བ་གཉིས་ལུས། དེར་བློན་པོ་སླེབས་སོ། །དེ་ནས་སྒོ་དོང་སྒོ་མོ་འགགས་པ་དེ། རྒྱ་ནག་གི་ལྷ་སྲུང་མ་དགའ་བས་ལན་པར་ཤེས་ནས། ཤིང་སྣའི་དུད་པ་ཆེན་པོ་བཏང༌། ཟས་ཆང་གི་ཕུད་གཏོར་ནས་འདི་ལྟར་བྱས་སོ། ། གསོལ་ལོ་གསོལ་ལོ་ལྷ་ལ་གསོལ། །རྒྱ་ནག་རྒྱལ་པོའི་ལྷ་ལ་གསོལ། །གྲོང་ཁྱེར་ཟིམ་ཤིའི་ལྷ་ལ་གསོལ། །རྒྱ་རྗེ་བཙན་པོའི་ལྷ་ལ་གསོལ། །བཀྲ་ཤིས་ཁྲི་སྒོའི་ལྷ་ལ་གསོལ། །ནགས་མ་གྱེན་ལ་ལོང་དུ་གསོལ། །བོད་བློན་རྣམས་ཀྱི་ལྷ་ལ་གསོལ། ཁ་བ་ཅན་པའི་ལྷ་ལ་གསོལ། །རྒྱ་མོ་ཀོང་ཇོ་བསུ་རུ་ཤོག །ཅེས་གསོལ་མཆོད་དི་རི་རི་བྱས་པའི་ནུབ་མོ་ནགས་ཐམས་ཅད་གྱེན་ལ་ལངས་ཏེ་འགྲོ་ཐུབ་པ་བྱུང་ངོ༌། །དེ་ནས་བྱེ་མའི་ལ་དགུ་འཁྱགས་ཁ་བསྐོར། མུན་པའི་རུམ་དུ་མར་མེ་བཏེག སེང་ལྡེང་གི་ནགས་མ་གཡས་སུ་ལོངས། གླ་བའི་ནགས་མ་གཡོན་དུ་ལོངས། བོད་དུ་གེགས་མེད་པར་སླེབ་བྱུང་ངོ༌། །དེ་ནས་རྒྱལ་པོའི་དྲུང་དུ་བང་