[A:285]དུ་ཐིམ་མོ། །དེ་ནས་རྒྱལ་པོ་རང་བྱོན་བཅུ་གཅིག་ཞལ་གྱི་དྲུང་དུ་ཕྱིན་ཏེ། འཕགས་པ་ལ་བསྟོད་པ། ཆོས་སྐུ་སྟོང་པའི་ངང་ཉིད་ལས། །འགྲོ་བའི་དོན་དུ་བཞེངས་པའི་སྐུ། །ཞི་བའི་ཞལ་བཞི་ཁྲོ་ཞལ་བདུན། །བཅུ་གཅིག་ཞལ་ལ་ཕྱག་འཚལ་ལོ། །རྩ་བའི་ཞི་ཞལ་དཀར་པོ་གསུམ། །རབ་ཏུ་འཛུམ་ཞིང་མཛེས་པ་སྟེ། ། ལས་དང་ཉོན་མོངས་ཞི་མཛད་པ། །ཆོས་སྐུའི་ཞལ་ལ་ཕྱག་འཚལ་ལོ། །དེ་སྟེང་བཙོ་མ་གསེར་མདོག་ཅན། །རྔམས་པའི་ཞལ་གསུམ་བཞད་པའི་དཔལ། །ཚེ་དང་བསོད་ནམས་དཔལ་འབྱོར་གསུམ། །རྒྱས་པར་མཛད་ལ་ཕྱག་འཚལ་ལོ། །དེ་སྟེང་བྱི་རུ་ལྟར་དམར་བའི། །དབང་གི་ལས་མཛད་ཞལ་གཉིས་པོ། །རྣམ་པར་གཙིགས་པའི་ཁྲོ་གཉེར་ཅན། །ལོངས་སྐུའི་ཞལ་ལ་ཕྱག་འཚལ་ལོ། །དེ་སྟེང་དྲག་པོའི་ལས་མཛད་པ། །དུད་སྤྲིན་མདོག་འདྲ་ཞལ་གཉིས་པོ། །འཇིགས་ཤིང་རྔམས་པའི་སྤྱན་གསུམ་བགྲད། །སྤྲུལ་སྐུའི་ཞལ་ལ་ཕྱག་འཚལ་ལོ། །དེ་སྟེང་བླ་མ་སྤྲུལ་པའི་སྐུ། །སངས་རྒྱས་ཀུན་འདུས་ལི་ཁྲིའི་མདོག །འོད་དཔག་མེད་མགོན་རྒྱལ་བ་ཡི། །གཙུག་རྒྱན་ཅན་ལ་ཕྱག་འཚལ་ལོ། །པདྨའི་འདབ་འདྲ་དང་པོ་ཡིན། །ཕྱག་གཉིས་ཐུགས་ཀར་ཐལ་སྦྱར་ནས། །སངས་རྒྱས་ཀུན་གྱི་ཐུགས་རྗེ་རྣམས། །བསྐུལ་བར་མཛད་ལ་ཕྱག་འཚལ་ལོ། །གཡས་ཀྱི་ཕྱག་བཞི་རིམ་པ་བཞིན། །བགྲང་ཕྲེང་འཁོར་ལོ་མཆོག་སྦྱིན་དང༌། །དུས་གསུམ་སངས་རྒྱས་འོད་དཔག་མེད། །ལེགས་པར་བསྣམས་ལ་ཕྱག་འཚལ་ལོ། །གཡོན་གྱི་ཕྱག་བཞི་རིམ་པ་བཞིན། །པད་དཀར་སྤྱི་བླུགས་རིན་པོ་ཆེ། །ཐབས་ཤེས་ཟུང་འཇུག་མདའ་དང་གཞུ། །ལེགས་པར་བསྣམས་ལ་ཕྱག་འཚལ་ལོ། །གཡས་ཀྱི་ཡན་ལག་བཅུ་དགུ་ན༑ ༑རིན་ཆེན་ཞགས་པ་ལྷུང་བཟེད་གྲི། །རྡོ་རྗེ་མེ་ཤེལ་ཆུ་ཤེལ་གཞུ། །ལྕུག་མ་