[A:188]བློན་པོའི་ཚོགས་དང་བཅས། །བོད་འབངས་འཁོར་དང་བཅས་པས་མཐའ་མ་བསྐོར། ཁ་དོག་སྣ་ཚོགས་ལྡན་པ་འཇའ་ཡི་གུར། །རྒྱལ་པོ་བཞུགས་པའི་མཁའ་ལ་གདུགས་ལྟར་འཁྱིལ། །བུ་རམ་རྒུན་འབྲུམ་ཀ་ར་ཞལ་ཟས་སོགས། །རོ་བརྒྱ་ལྡན་པའི་ཟས་ཀྱི་ཚོགས་རྣམས་ཀྱང༌། །རྒྱལ་པོས་གསོལ་ཞིང་འཁོར་རྣམས་ཚིམ་པར་བྱེད། །ཆོས་རྒྱལ་ཆེན་པོའི་སྐུ་ཡི་སྐྱོ་སངས་ལ། །འབག་དང་སེང་གེ་གཡག་སེང་སྟག་སེང་དང༌། །རྔ་བྲོ་མཁན་དང་གར་མཁན་ལ་སོགས་ཀྱིས། །རེ་རེ་བཞིན་དུ་གར་དང་རྩེད་མོ་འབུལ། །ལྷ་ཡི་རྔ་བོ་ཆེ་དང་པི་ཝང་དང༌། །རོལ་མོ་སིལ་སྙན་རྣམས་ཀྱིས་མཆོད་པ་དང༌། །སྨན་མཆོག་ཨ་ག་རུ་དང་ཙནྡན་དང༌། །དྲི་ཞིམ་བདུག་སྤོས་རྣམས་ནི་རླུང་ལྟར་གཡོ། །གདུགས་དང་རྒྱལ་མཚན་བ་དན་ལྷབ་ལྷུབ་དང༌། །སྣ་ཚོགས་དར་གྱིས་ནམ་མཁའ་གང་བར་མཆོད། །ཡིད་འོང་མཛེས་པའི་བུ་མོ་བཅུ་དྲུག་གིས། །མཛེས་པའི་རྒྱན་བཅས་མེ་ཏོག་ཐོགས་ནས་ནི། །གླུ་དང་གར་གྱིས་རྣ་བའི་དགའ་སྟོན་འགྱེད། །དགའ་བདེ་སྐྱིད་པའི་བཀའ་ཁྲིམས་མཛད་པའི་ཚེ། །བོད་འབངས་མི་རེས་རྟ་རེ་ཞོན་ནས་རྒྱུག །ཤིང་རེའི་རྩེ་ལ་དར་རེ་ཕྱར་གིན་བཞག །དམ་པ་ཆོས་ཀྱི་རྔ་ཆེན་དམ་པ་བརྡུང༌། །དགེ་བ་བཅུ་ལ་བསྟུན་པའི་རྒྱལ་ཁྲིམས་བཅས། །འདོད་ཡོན་ལྔ་དང་བསྟུན་པའི་ལོངས་སྤྱོད་སྤེལ། ཁ་བ་ཅན་པའི་རྒྱལ་ཁམས་འདི་ཉིད་དུ། །དགེ་བཅུའི་རྒྱལ་ཁྲིམས་མཁའ་ལ་ཉི་ཟླ་བཞིན། །བོད་ཡུལ་གངས་ཅན་ཁྲོད་འདིར་ཁྱབ་པར་མཛད། །བློན་པོ་ཐོན་མིས་རྒྱ་གར་ནས་ཡི་གེ་བསྒྱུར་བ་ལས། རྒྱལ་པོས་དགེ་བ་བཅུའི་ཁྲིམས་བཅས་པའི་ལེའུ་སྟེ་བཅུ་པའོ།། །།