[A:188]blon po'i tshogs dang bcas/ /bod 'bangs 'khor dang bcas pas mtha' ma bskor/ kha dog sna tshogs ldan pa 'ja' yi gur/ /rgyal po bzhugs pa'i mkha' la gdugs ltar 'khyil/ /bu ram rgun 'brum ka ra zhal zas sogs/ /ro brgya ldan pa'i zas kyi tshogs rnams kyang / /rgyal pos gsol zhing 'khor rnams tshim par byed/ /chos rgyal chen po'i sku yi skyo sangs la/ /'bag dang seng ge g.yag seng stag seng dang / /rnga bro mkhan dang gar mkhan la sogs kyis/ /re re bzhin du gar dang rtsed mo 'bul/ /lha yi rnga bo che dang pi wang dang / /rol mo sil snyan rnams kyis mchod pa dang / /sman mchog a ga ru dang tsandan dang / /dri zhim bdug spos rnams ni rlung ltar g.yo/ /gdugs dang rgyal mtshan ba dan lhab lhub dang / /sna tshogs dar gyis nam mkha' gang bar mchod/ /yid 'ong mdzes pa'i bu mo bcu drug gis/ /mdzes pa'i rgyan bcas me tog thogs nas ni/ /glu dang gar gyis rna ba'i dga' ston 'gyed/ /dga' bde skyid pa'i bka' khrims mdzad pa'i tshe/ /bod 'bangs mi res rta re zhon nas rgyug /shing re'i rtse la dar re phyar gin bzhag /dam pa chos kyi rnga chen dam pa brdung / /dge ba bcu la bstun pa'i rgyal khrims bcas/ /'dod yon lnga dang bstun pa'i longs spyod spel/ kha ba can pa'i rgyal khams 'di nyid du/ /dge bcu'i rgyal khrims mkha' la nyi zla bzhin/ /bod yul gangs can khrod 'dir khyab par mdzad/ /blon po thon mis rgya gar nas yi ge bsgyur ba las/ rgyal pos dge ba bcu'i khrims bcas pa'i le'u ste bcu pa'o// //