[A:199]གོན་ནས་གྲོང་ཁྱེར་གྱི་མཐའ་བསྐོར་ན་མི་ནད་ཕྱུགས་ནད་ཐམས་ཅད་ཆད། སད་སེར་བྱུང་དཽགས་པའི་དུས་སུ་འདི་གོན་ནས་ཞིང་རྣམས་མཐའ་བསྐོར་ན་སད་དང་སེར་བ་ཐུབ། འཁྲུག་པ་བྱེད་པའི་དུས་སུ་འདི་གོན་ནས་འཐབ་ན་གཡུལ་ལས་རྒྱལ་བར་འགྱུར་རོ། །འཛམ་བུའི་གླིང་ན་རྨོག་འདི་ལས་ལྷག་པའི་ནོར་མེད་པས། གོང་ཐང་དཔྱད་ཀྱིས་མི་ཆོད། འདི་ལྷ་གཅིག་དེའི་རིན་དུ་འབུལ་ལོ། ཁྱེད་ཀྱི་ལྷ་གཅིག་མཛངས་མ་དེ། ངེད་བོད་ཀྱི་རྒྱལ་པོའི་བཙུན་མོ་ལ་བཀའ་གནང་བར་ཞུ་བྱས་པས། རྒྱལ་པོའི་ཞལ་ནས། ཁྱེད་བོད་ཀྱི་རྒྱལ་པོ་དེ་སྙིང་གདོན་གྱིས་བསླུས་སམ། སེམས་འཁྲུལ་པ་ཞིག་འདུག ང་ནི་སངས་རྒྱས་འོད་སྲུངས་ནས་དེང་སང་ཕན་ཆོད་ལ་རྒྱལ་བརྒྱུད་མ་ཆད་པ་ཡིན། ཁྱོད་དང་གཉེན་ཟླ་མིན་ཏེ། འོན་ཀྱང་ཁྱོད་ས་ཐག་རིང་ནས་སླེབ་འདུག་པ། ཁྱོད་རང་གི་ཡུལ་དུ་ལོག་ལ། ཁྱོད་ཀྱི་རྒྱལ་པོ་དེ་ལ། ཆོས་དགེ་བ་བཅུ་དང་བསྟུན་པའི་རྒྱལ་ཁྲིམས་འཆའ་ནུས་སམ་མི་ནུས་དྲིས་ཤོག དེ་ནུས་ན་ལྷ་གཅིག་སྟེར། མི་ནུས་ན་མི་སྟེར་གསུང་ངོ༌། །དེར་མགར་གྱིས་བཀའ་ཤོག་གི་སྒྲོམ་བུ་གསུམ་ཡོད་པའི་དང་པོ་དེ། རྒྱལ་པོའི་ཕྱག་ཏུ་ཕུལ་བས། དེ་ཁ་ཕྱེས་ནས་གཟིགས་པས། མཐིང་ཤོག་ལ་གསེར་གྱིས་བྲིས་པ། བལ་པོའི་ཡི་གེར་འདུག་པ་འདི་ལྟར་རོ། ཁྱེད་བལ་པོའི་རྒྱལ་པོ་ལ་དགེ་བ་བཅུའི་ཁྲིམས་ཡོད། ང་བོད་མཐའ་འཁོབ་ཀྱི་རྒྱལ་པོ་ལ་དེ་བཞིན་མེད་དེ། རྒྱལ་པོ་ཁྱོད་ཁྲིམས་ཡོད་པ་ལ་དགའ་ནས་བུ་མོ་སྟེར་ན། ངས་སྐུ་ལུས་ཀྱི་སྤྲུལ་པ་ལྔ་སྟོང་དུ་སྤྲུལ་ནས། དགེ་བ་བཅུ་དང་ལྡན་པའི་ཁྲིམས་སྔ་དྲོ་ཞིག་ལ་འཆའ་ནུས་པར་བྱེད་དོ༑ ༑དེ་ངོ་མཚར་མི་ཆེའམ། དེ་ལྟར་བྱས་ཀྱང་བུ་མོ་མི་སྟེར་ན། ངས་སྤྲུལ་པའི་དམག་ཁྲི་ཕྲག་ལྔ་བཏང་ནས། ཁྱོད་གསོད། ལྷ་གཅིག་ཕྲོགས། གྲོང་ཁྱེར་ཐམས་